19.09.2012, 12:35 Роби Вилијамс стана татко на Теодора Роуз
Неговата сопруга Ајда Филд во вторникот попладне, на 18 септември го донесе на свет девојчето Теодора Роуз Вилијамс, попозната како Тедеи
Пејачот Роби Вилијамс стана татко. Неговата сопруга Ајда Филд во вторникот попладне, на 18 септември го донесе на свет девојчето, на кое парот му даде име Теодора Роуз.
Роби Вилијамс вечерта ги известил своите обожаватели преку „Твитер“ дека добил ќерка. „Теодора Роуз Вилијамс, попозната како Тедеи, родена е во 15 часот и 33 минути, на 18 септември. Бебето, мајката и таткото се одлично“, напишал пејачот.
Роби и Ајда се венчаа пред две години и ова е нивно прво дете. Честитките набрзо стигнале од пријателите и колегите, а најбрз бил колегата на Роби, Гери Барлоу од бендот „Тејк дет“.
Вилијамс минатата недела изјавил дека ќе биде многу зафатен и се плаши дека ќе го пропушти раѓањето на ќерката. Тој тогаш навестил дека девојчето ќе има традиционално име.
„Избравме име, но нема да биде Епл или такво нешто. Во прашање е традиционално, старинско име“, рекол Роби, алудирајќи на ќерката на Гвинет Палтроу и Крис Мартин.
Американката Ајда Филд се породила во Лос Анџелес, но семејството планира наскоро да се пресели во Лондон.
„Не сакам мојата ќерка да оди на училиште со идиоти. Таков вид на идиоти постојат само во Лос Анџелес“, бил строг Роби.
|
