10.09.2012, 15:14 Штетата во „Калдрма“ проценета на 1,7 милиони евра
Претставници на Агенцијата за патишта се појавија на денешното продолжение на судскиот процес кој се води за 86 лица, обвинети во процесот наречен „Калдрма“.
Еден од повиканите не можеше да даде конкретен одговор за врската меѓу Агенцијата за патишта и „Македонија пат“, односно кој треба да ја бара евентаулната штета, сепак, на крајот беше соопштено дека обвинетите, наводно, причиниле штета од повеќе од 107 милиони денари или нешто повеќе од 1,7 милиони евра.
И денешното судење почна со тензии и довикувања, а следеше и реакција кога беше соопштено колкава е штетата која што ја побарува Агенцијата за патишта. Кога стивнаа реакциите адвокатите и обвинетите поставија многу прашања до сведокот од тоа како функционирал системот за наплата на патарините па се' до апаратите со кои се регистирала наплатата.
Судењето на сите поранешни вработени на наплатните рампи долж Коридорот 10 продолжува утре и според предвидувањата можно е да дојде до разгледување на вештачењето кое што е изработено на 700 страници. (Љ.С.)
|
