Најбогатиот Французин ќе продолжи да плаќа данок во Франција

Иако бриселскиот весник весникот „Соар“ вчера објави дека најбогатиот Французин, Бернар Арно, кој е сопственик на компанијата што ги поседува правата на повеќе луксузни марки меѓу кои и „Луј Витон“ и „Булгари“, побарал белгиско државјанство „поради чувствителна инвестиција во Белгија“, француските медиуми во ваквата негова намера гледаат само можност да го избегне плаќањето на даноци во Франција.

„Соар“ наведе дека ако Арно добие двојно државјанство, тоа ќе му го олесни проектот во Белгија, на кој работи и за кој не се соопштуваат никакви детали. Арно одамна имал право да добие белгиско државјанство, бидејќи веќе десетина години поседува имот во Белгија. Арно е на четврто место во светот според богатство што го поседува со имот вреден 41 милијарди долари.

Според медиумите во Франција, со добивањето на белгиско државјанство, Арно потоа ќе побара да биде жител на Монако и со тоа да плаќа данок во Монако, каде давачките се пониски. Имено француските државјани не можат да плаќаат данок во Монако, но како белгиски државјани тоа е можно.

Пред неколку години француската јавност беше исто така разбранувана по намерата на рок ѕвездата Џони Холидеј да побара белгиско државјанство, кој исто така сакаше да избегне плаќање на данок во Франција.

Од компанијата раководена од Арно викендов беше издадено посебно соопштение за јавноста со кое се потврдува дека тој ќе продолжи да ги плаќа даноците во Франција.

Во денешните медиуми се шекулира дека дошло и до контакти меѓу претседателот на Франција Франсоа Оланд и најбогатиот Французин, па и самиот шеф на државата во синоќешното ТВ-интервју, следено од десет милиони Французи рече дека „нема место за полемика“.

Информацијата за намерите на Арно имаше „ефект на бомба“ во Франција, бидејќи беше протолкувана како начин бизнисменот да се спаси од намерите на претседателот Оланд да обезбеди финансиска стабилност на земјата преку оданочување со 75 проценти на личните доходи над еден милион евра. Поранешниот француски премиер Франсоа Фијон за оваа намера изјави дека „преземањето глупави одлуки води кон страшни резултати“.