Бомба во домот на британско семејство убиено на француските Алпи

Полицијата од безбедносни причини ги евекуираше соседите на Ал Хили и им забрани враќање во нивните домови, а го блокираше и целиот кварт

Специјалната единица на британската Армија за откривање бомби и експлозивни направи, како и специјалци на полицијата почнаа денеска потрага по бомба во куќата на британскиот инжинер Саад ал Хили (50), кој заедно со неговото семејство беа убиени во Франција.

Полицијата од безбедносни причини ги евекуираше соседите на Ал Хили и им забрани враќање во нивните домови, а го блокираше и целиот кварт, додека трае потргата по бомбата.

Претставник на полицијата соопшти денеска дека нема цврсти созананија дека во куќата на Британецот од ирачко потекло има бомба, но потврди дека во текот на претерсот што траеше неколку денови, на барање на француските правосудни власти, се откриени траги од експлозивни материјали.

Тоа предизвика тревога и ја пренасочи досегашната истрага, во трагање по експлозив или можеби поставена бомба. Во трагањето во куќата на Ал Хили, што се наоѓа во лондонската населба Сари, учествуваат и француските детективи кои трагаат по убијците.

Саaд ал Хили, неговата сопруга и нејзината мајка, беа најдени убиени во еден автомобил, во шума близу до езерото кај Анеси. Во професионално изведеното убиство, со два куршуми во главата, беше убиен и еден случаен минувач, француски велосипедист, кој бил во прошетка, додека двете ќерки на семејството Ал Хили, го преживеаја нападот.

Постарата од денеска е надвор од кома, во која ја оддржуваа лекарите, па таа ќе може да сведочи и да даде опис на убијците, кои не успеаја и неа да ја ликвидираат, додека помалата ќерка, која остана неповредена, затоа што паднала под мртвото тело на мајката, синоќа е префрлена од Франција во Лондон.

Британската полиција, како и истрагата на француските власти заеднички работат во откривањето на мотивот за ова злосторство, за да може да дојдат до нарачателот за ликвидација на Ал Хили, во која за малку ќе настрадаше целото негово семејство.

Тој е роден во Багдад, но со своите родители и семејството се преселил во Велика Британија во седумдесетите години на 20 век, бегајќи од репресијата на режимот на Садам Хусеин.

Лондонските медиуми открија дека тој стравувал за својата безбедност и тоа им го соопштил на некои од соседите, како и дека работел на повеќе трајни проекти за британската Влада и за индивидуални нарачатели, во областа на вооружувањето.

Претходно се тврдеше дека убиството можеби е мотивирано од некои семејни расправии, околу наследството, но братот на убиениот инженер Ал Хили, кој исто така живее во околината на Лондон, категорично демантираше дека имало било какви семејни расправии за пари.