Мое ќоше

Крунскиот сведок Магаш

Ерол Ризаов

Голем ќеф му прават на Груевски сведоштвата на Магаш против неговите колеги премиери и министри

Извесен Љубомир Магаш, криминалец и пробисвет од босанска забит, стана главен предизборен адут на преродбениците од ВМРО-ДПМНЕ. На човекот му фрлиле некоја паричка да кажува гачки и сказни како е направен најголемиот грабеж во Македонија со шверц на нафта за време на ембаргото на Србија. Фотографиите на хит-sвездата, носител на главната улога, во најновата вмровска сапуница во копродукција со еден српско- босански авантурист веќе три месеци се присутни на насловните страници во речиси сите медиуми. Изјавите и интервјуата на крунскиот сведок се пренесуваат како ексклузива од највисок ранг, небаре се работи за новинарски подвиг. Тешко се доаѓа до Магаш. Само ако ја имаш довербата на ВМРО-ДПМНЕ, врската може да биде воспоставена и веднаш ја добиваш на маса спектакуларната информација како во „елитната“ дебармаалска кафана се договарале зделките, како во црни вреќи се носеле парите од шверцот со нафта директно во гепекот на возачот на Фрчкоски. Главни во шверцот биле Аркан, Слободан Милошевиќ и единствениот преживеан од криминалната тројка, Бранко Црвенковски. Каков трилер.

Истата вечер, нарачателите на информациите, работодавците на Магаш, ја делат јавно загриженоста со нацијата преку траорниот глас на Александар Бичиклиски. Штом овој отвори уста да го праша Црвенковски нешто многу важно, малите деца почнуваат да плачат од уплав. Предлагам телевизиите пред да го пуштат Бичиклиски во етер, да стават знак дека е забрането за деца под 16 години, дури ни во присуство на родители. Толку е сугестивен баритонот на ВМРО-ДПМНЕ, поточно на госп. Бичиклиски, што дури и некој повозрасни луѓе штом го чујат, ја покриваат главата со чаршаф. Обично тоа се граѓани со образ кои ги јаде туѓиот срам. Претпоставувам дека на македонскиот премиер Никола Груевски му е поголем ќеф кога слуша како негови колеги, премиери, министри, познати политичари се прават пуздер пред јавноста од еден ебиветер и неранимајко. За голема гордост и задоволство е ваквата голема и стратегиска нарачка на ВМРО-ДПМНЕ. Она што не може ниту една кампања и еден куп експерти и аналитичари доволно да оцрнат, може да го сработи сам Магаш. Но, од сиот овој успех, на кој и Интерпол завидува, најчудно е што за ваквите брилијантни сведоштва ништо не презема јавниот обвинител. Со прст не мрда да поведе постапка за утврдување на вистината. Ако криминалец е клучен сведок за грабежот на македонски премиери и министри и за кршењето на ембаргото спрема Србија, тогаш местото за неговите изјави се пред јавниот обвинител. Но, очигледно дека ни оддалеку тоа не целта. Груевски многу добро знае како е кршено ембаргото, кој го кршел и каде завршиле парите. Еден од неговите коалициски партнери дури отвори и специјален пат, авенија на самракот, по македонските планини по кој се движеа конвои стока нарачана од Србија и, обратно, од Србија кон светот. Упатените велат уште не се израмнети сметките. Долгот не е вратен во целост. Милошевиќ додели и посебни признанија и благодарници за нашите заслужни дејци, ама борчот си е борч. Треба да се врати.

Има многу луѓе во Македонија, во НАТО, во Србија, во Босна, во Црна Гора.... кои знаат како и зошто е кршено ембаргото, зошто тоа често и од самиот НАТО е премолчувано, каде се парите и многу други знајни и незнајни детали. Ова со Магаш е само евтина валканица која дури и за една политичка пресметка е под нивото кога се вообичаени ниските удари. ВМРО-ДПМНЕ веќе не удира во писката и под стомакот, туку очајно гризе уво. Мора да им е многу густо кога Магаш го одбрале за заштитен знак. Но, во политиката е како и во животот - тоа што го правиш на другите, тоа ќе ти го прават тебе. Како што се наближуваат изборите, ќе слушнеме уште многу сведоштва и приказни за криминалот и валканиците на нашите водачи. Секој според својата партиска припадност ќе си одбира на кои криминалци и сведоци ќе им верува. Со сигурност знам дека од ваквата бербат политика сите на крајот ќе бидат извалкани. Македонските вредности во сите области отсекогаш имале ниска цена најмногу поради превласт, омраза и завист. Затоа се' повеќе наликуваме на дрво без корен. Така е тоа кога Магаш е клучен сведок.