Поглед

Маката на тутунарите

Соња Маџовска

Нема крај на маките на тутунарите. Таман помислија дека во оваа гранка работите конечно си дојдоа на свое место, редовно им се исплаќаат субвенции по 60 денари за килограм предаден тутун, се појави нова шлаканица.

Од една страна, Европската комисија најавува забрана за ориенталниот тутун, од друга Светската здравствена организација денес треба да ги објави препораките со кои ќе се ограничи финансиската и техничката поддршка за одгледување на ориенталниот тутун, ќе се диктира дури и временски период кога може, а кога да не се сади тутун, а ќе се ограничат и површините каде што може да се одгледува.

Тутунарите се во паника, тие сметаат дека доколку се усвојат овие препораки, целосно ќе биде уништено производството на тутун во земјава, а над 150.000 луѓе ќе останат на улица.

Тутунопроизводството е една од најприходните гранки. Од земјава се извезува суров тутун во вредност од 120 милиони долари, а 35 милиони долари како цигари. Извозот на тутун и преработки од тутун учествуваат од 22 до 29 проценти во вкупниот извоз од земјоделско-прехранбениот сектор. Приближно 30 отсто од државниот буџет се полни од работењето на тутунските компании присутни во државава. Овие податоци покажуваат колку е важна оваа гранка за земјава. Но, и покрај тоа Владата и Министерството за земјоделство засега молчат, не кажуваат што ќе преземат. Тие засега само чекаат и се надеваат дека вакви препораки нема да бидат донесени, по некоја случајност. Но, како што први сакаат да се сликаат кога ги делат субвенциите, така министерот Љупчо Димовски требаше завчера да биде во средина меѓу тутунарите на

прес-конференцијата на која тие загрижено кажуваа дека немаат алтернатива.