Едиторијал

Договор или разделба

Александра М. Митевска

Во парламентот веќе не се знае кој пие, а кој плаќа; кој е власт, а кој опозиција...

Дали владејачкото мнозинство го сочинуваат ВМРО-ДПМНЕ и ДУИ, која, деновиве, тактички ги игнорира сите закони што доаѓаат од Владата, во која и самата учествува? Или мнозинство наеднаш стана СДСМ, чии пратеници почнаа џентлменски да ги поддржуваат лутите противници од ВМРО-ДПМНЕ. Или, можеби, ВМРО-ДПМНЕ преку ноќ се претвори во опозиција, штом има потреба преку пратеници да поднесува закон за бранители, бидејќи тоа, очигледно, не може да го стори на владина седница?

Колку е парадоксална ситуацијата, најдобро се виде на случајот со заменичката-народен правобранител, која, ни крива ни должна, не ќе може да замине во пензија се' додека не се разреши кризата што го зафати Собранието, како рефлексија на кризата во Владата.

Атмосферата во законодавниот дом од ден на ден станува се' позбунувачка и се' пофрустрирачка, што јасно укажува дека државата е пред нов политички земјотрес. И тоа во период кога се испишуваат последните страници од новиот годишен извештај на Европската комисија. Реформите, како предуслов за евроинтеграциите, се чини, и овој пат ќе бидат жртвувани за политички каприци!

Сликите од парламентот, најверојатно, се верна копија на случувањата во Владата. Со таа разлика што на „Илинденска“ нема опозиција (барем не во вистинска смисла на зборот) и што настаните таму не се одвиваат пред очите на јавноста.

Политичката клима што се создаде како резултат на конфликтот што избувна меѓу коалициските партнери во Владата од ден на ден станува се' понеодржлива. Тоа можеби е поволна ситуација за ловење политички поени, но, во никој случај, не е добра препорака за држава која претендира да се претставува како сериозна.

И потоа некој пак нека каже дека „институциите функционираат во полна смисла“, кога парламентот е пред парализа. Кај и да е, ќе испари и конструктивноста што СДСМ ја манифестира деновиве и јасно ќе се види дека ВМРО-ДПМНЕ, практично, веќе нема мнозинство, иако, формално, се' уште е во коалиција со ДУИ.

Утре ќе се наврши цел еден месец откако „Слупчане“ ги скара повеќегодишните партнери во Владата. Напрегнатоста во односите меѓу ВМРО-ДПМНЕ и ДУИ ја зафати целата политичка арена и упорно прогресира. Ако нејзината цел не е (додека е матно) да се протуркаат таблите со нови имиња на училиштата во Чаир или новата регулатива за бранителите, тогаш веќе нема време за понатамошно одолжување на решението.

Оние што го заплеткаа јазолот треба и да го отплеткаат. Од ВМРО-ДПМНЕ и ДУИ зависи како ќе го направат тоа и дали ќе ја одберат вистинската формула. Дали ќе се договорат или конечно ќе се разделат?

Груевски и Ахмети веќе не можат да ги држат главите во песок. Кај и да е ќе мора да се соочат еден спроти друг или со јавноста и гласно да кажат дали нивната комуникација има шанса да се поправи или по „Слупчане“ и законот за бранителите сите шанси се прокоцкани.

За премостување на кризата постојат повеќе сценарија. Помирување, нов распоред на силите во парламентот, преодна влада, брзи парламентарни избори... Сите тие се далеку од идеални, ама кое и да се примени, сигурно, ќе биде подобро од блокадата на институциите и ситните подметнувања што сега се случуваат.