(ФОТО) Демонстрации во Барселона за независност на Каталонија

Под мотото „Каталонија - следната држава во Европа“ над еден милион луѓе синоќа демонстрираа во Барселона за незавиноста на североисточната шпанска област

Повеќе од еден милион луѓе синоќа демонстрираа во Барселона во знак на поддршка за незавиноста на североисточната шпанска област Каталонија.

Според податоци на полицијата во демонстрациите учествувале 1,5 милиони луѓе, додека организаторите тврдат дека бројот на демонстранти бил над два милиони.

Демонстрациите под мотото „Каталонија - следната држава во Европа“ беше организирана по повод официјалниот празник на областа. Таа беше поддржана од повеќе политички партии во регионот, вклучително и владејачката партија „Конвергенција и унија“.

Лидерот на партијата Артур Мас, кој е и претседател на Владата во Каталонија, ја повика шпанската Влада „да не остане глува за барањето на мнозинството од Каталонците за независност“.

Шпанскиот премиер Маријано Рахој наведе дека Каталонија има многу сериозни финансиски проблеми, кои треба заеднички да се решат, а не преку обид за изолација од другиот дел на земјата“.

Каталонија има 7,5 милиони жители и има највисоко ниво на автономија од 17 шпански области, вклучително и сопствени полициски сили.

Желбата за независност се засили по влошувањето на економската криза во Шпанија. Каталонските власти сметаат дека задолженоста е резултат на ограничената фискална автономија.