06.09.2012, 15:54 ДУИ го блокира Собранието и бара помош од Иванов
Коодинаторот Талат Џафери се обиде да докаже дека Законот за бранители е неуставен и антиалбански
Демократската унија за интеграција, среде деликатната политичка ситуација, реши да го фати коалицискиот партнер ВМРО-ДПМНЕ на кондиција. Со долги говори од типот на Кастро и Чавез, ДУИ се обидува да докаже дека поднесениот Закон за бранители е неуставен, антиалбански и недемократски, но и да купи време и да го пречека премиерот Никола Груевски со парализирана Комисија за труд и социјала, иако не знае каков ефект може да донесе тоа.
Прв кој се обиде да демонстрира издржливост беше кординаторот на пратеничката група на ДУИ, Талал Џафери, кој по вчерашните три часа денеска речиси уште толкку беше на говорницата читајќи го Уставот и цитирајќи ги законите во детали. Вели, не знае колку ќе говори, но ќе биде долго.
„Не знам дали ќе завршам денеска. Можно е да говорам и утре и в понеделник“, рече Џафери, кој побара помош и од претседателот Ѓорге Иванов. Според него, претседателот треба да сугерира предлагачот на законот да се откаже од идејата да се донесе ваков неуставен закон. „Претседателот кога ќе отиде во Брисел или кога ќе се сретне со некој државник првото нешто што го прашуваат е дали се почитува Охридскиот договор“, кажа Џафери.
Веле Ѓорѓиевски од ВМРО-ДПМНЕ, без да прејудицира колку ќе траат мачните дебати, категорично тврдеше дека законот мора да се донесе со цел Македонија да им се оддолжи на бранителите. „Ова не значи распад на коалицијата но не знам да ви кажам колку ќе трае“, потенцира Ѓорѓиевски.
За разлика од него Џафери побара законот да не го види светлото на денот. „Владата нема дадено свое мислење за законот. Таа треба да даде мислење за закон кој го поднесуваат други овластени предлагачи. Во Владата има поделени мислења и затоа тој треба да се врати таму“, резонира Џафери. (Н.К.)
|
