Тодоров не попушта, лекарите ќе одат на штрајк

Министерот за здравство сакал проектот да го стави во мирување, но се премислил по средбата со лекарите

Јасмина Јовановска

Поради каприц или од други причини, министерот за здравство Никола Тодоров нема да ја повлече платата по успешност, иако таа предизвика големо незадоволство меѓу лекарите. По последната средба со гранковиот синдикат, која се одржа во средата доцна попладне, иако министерот сакал да најде заеднички јазик со лекарите, па дури и проектот да го стави во мирување, тој одлучи да не попушти.

„Иако бевме на добар пат да најдеме компромисно решен��е со Синдикатот за здравство, одредени струи не почекаа и ја објавија информацијата за штрајк. Преговорите продолжуваат“, изјави министерот Тодоров.

Лекарите од клиниките во Скопје кои пред два дена се одлучија за генерален штрајк вчера и официјално го закажаа протестот за 24 септември кога ќе го изразат револтот од воведувањето плата по успешност. На министерот за здравство Никола Тодоров му дадоа 15 дена да размисли и да преговараат за трите барања, кои и официјално ќе му ги предадат.

Ова било договорено на вчерашниот состанок на независниот Клинички синдикат, од каде што велат дека освен повлекување на платата по успешност, клиничките лекари бараат зголемување на платите, како и здравствените власти да го поправат односот и вокабуларот кон лекарската фела.

„Барањата се наредени по приоритет, па без исполнување на барањето за зголемување на платите нема понатамошни преговори“, беше дециден д-р Дејан Ставриќ, претседател на независниот клинички синдикат.

Штрајкот ќе трае до исполнување на барањата, при што ќе се примаат само итни случаи. Како што нагласи Ставриќ, лекарите бараат платите да се изедначат со платите од другите општествено одговорни професии. Најниската плата е 8.000 денари, додека еден специјалист има просечна плата од 550 евра. Колку за споредба, според неофицијални извори, судиите земаат плата и до 1.000 евра.

Според Ставриќ, уште со поделбата на првата плата се увидело дека проектот за плаќање по успешност е проект за манипулација, затоа што воопшто не кореспондира со реалната состојба.

„Во пракса се случи овој месец да бидат наградени лекари кои не исполниле толку колку што се наградени, а да бидат казнети лекари кои два до три пати ја натфрлиле нормата. Тоа ќе биде предмет и на кривични тужби, зашто многу луѓе се оштетени и ќе бараме да им се вратат парите“, појасни Ставриќ.

На клиники биле казнети околу 400 лекари.

Петицијата за штрајк ја имаат потпишано околу 90 отсто од лекарите, а на штрајкот на клиничкиот синдикат, како што најавија од таму, ќе му се приклучат и лекарите од болницата „Бардовци“, Институтот за ТБЦ, како и лекарите во клиничките болници.

„Има потписи од лекари припадници и на опозиција и на позиција, што прв пат се случува кога се поставува едно професионално барање“, додаде Ставриќ. Засега само гранковиот синдикат за здравство е на стенд-бај за штрајк.

И од гранковиот синдикат ни потврдија дека преговорите со министерот Тодоров биле во насока платата да се стави во мирување додека не се доработи и не се исправат пропустите.

„Се договоривме да се формираат две комисии една интернистичка и една хируршка кои ќе работат на доработка на системот“, ни изјави Љубиша Каранфилски, претседател на Синдикатот за здравство. И овој синдикат не отстапува од тоа проектот да се повлече, августовската плата да не се исплаќа според успешност, а платата да почнува од 100 отсто.