Граѓаните против нуклеарниот отпад

Блокадата на транспортот на нуклеарен отпад за време на викендот беше главна тема во германската јавност

На повидок е крај на блокадата на транспортот на нуклеарен отпад во Германија. Железничката композиција со која се пренесува радиоактивниот отпад од Франција и кој треба да биде складиран во германското место Горлебен треба да помине уште 30 километри до Даненберг. Таму контејнерите со атомски отпад ќе бидат претоварени на камиони кои ќе се упатат до привременото складиште во Горлебен.

Припадниците на полицијата во текот на ноќта не попуштија во активностите за отстранување на демонстрантите кои на шините крај Вендланд  поставија блокади со седење за да го стопираат транспортот на радиоактивниот атомски отпад кон складиштето во Горлебен.

Противниците на атомската енергија одговараа со повиците „Ние остануваме тука“. Сепак, полицијата трпеливо еден по еден успеа да ги отстрани од шините сите демонстранти.

Претходно синдикатот на полицијата соопшти дека дел од полициските службеници се повеќе од 24 часа на терен и се истоштетни. Блокадите со трактори спречија да биде извршена смена во полицијата.

Спорот и блокадата на транспортот на нуклеарен отпад за време на викендот беше главна тема во германската јавност. Многумина политички коментатори констатираа дека големите демонстрации, во кои дури имаше и насилство, не се само израз на незадоволство против складирањето атомски отпад во Германија, туку и протест поради атомската политика на владата на канцеларката Ангела Меркел и пред се' одлуката за продолжување на работниот век на атомските централи. Министерот за животна средина, Норберт Ретген, синоќа во телевизиско интервју уверуваше дека двете работи треба да се посматраат независно една од друга.

„Прашањето за складирање на високорадиоактивниот отпад се поставува целосно независно од прашањето за продолжувањето на работното време на атомските централи зашто ние веќе 40 и повеќе години ја користиме нуклеарната енергија од која произведуваме струја, што пак произлегува отпад за кој имаме обврска да го отстраниме“, истакна Ретген.

Министерот се осврна и на повеќечасовните судири во текот на вчерашниот ден меѓу противниците на транспортот на атомски отпад и полицијата, во кои беа употребени палки, солзавец и водени топови, а беше запалено и едно оклопно полициско возило:

„Ние го почитуваме правото на секој граѓанин да демонстрира за цел што смета дека е исправна, но за насилството како средство за политичка пресметка немаме никакво разбирање“, истакна Ретген. (Дојче веле)