ЕДИТОРИЈАЛ

Заканите на Ахмети

Гордана Дувњак

Беше ли изјавата на лидерот на ДУИ Али Ахмети дека не може да биде чувар на мирот во Македонија при евентуална поделба на Косово, нож во грбот на премиерот, Никола Груевски?

И да биде иронијата уште поголема, забоден истиот ден кога Македонија ги чествуваше двата Илиндена. Кога токму неговиот старо-нов коалиционен партнер, се потеше под врелото сонце на Пелинце и повикуваше на единство и на принципите на крушевскиот ��анифест. Во мигот кога следен од извиците „Никола, Никола, ти си наша судбина“, му објаснуваше на насобраниот народ дека Бог не создал различни, но сме биле предодредени да живееме заедно и во тоа била нашата сила.

Груевски немаше време ни да ја проголта кнедлата од партискиот договор со ДУИ, по кој државата и по цена на кршење на законот и на меѓународните договори се откажа од процесуирање на хашките случаи. Ги затвори како вознемирувачка книга преку автентично толкување на амнестијата, со кое прогласи дека и овие четири случаи, влегуваат под милоста на државата.

Неполни десет дена подоцна, премиерот веќе е предизвикан да се впушти во толкување на пораките на оној со кој ја дели власта и владиниот колач. По сите завршените пазарења за министерски фотелји, директорски места, втори и трети партиски ешалони...

Како ли ги сфати Груевски, а уште повеќе целата македонска јавност, зборовите на Али Ахмети искажани за државната косовска телевизија?

Дали неговите пораки треба да се разберат како сериозна закана за мирот и стабилноста на Македонија, или пак, како абер испратен до меѓународната заедница? Сепак, Ахмети во еден дел не остави простор за сомневање. Јасно си кажа дека доколку дошла водата до грло (читај, има обиди за промена на границите), нема да преземе одговорност ако луѓето решат сами да се организираат.

Тогаш, никој не ќе можел да ја контролира ситуацијата како во 1990, 1999 или 2001година, доколку Албанците во случај да процениле дека им се загрозени нивните интереси во целина, заеднички тргнат да се организираат во фронт. Што преведено би значело дека немао да седат мадро, туку повторно ќе се фатат за оружје!

По ваква една експлозивна изјава дадена во овие топли денови, само надлежните од МВР преку својот портпарол Иво Котевски побрзаа да смируваат дека нема безбедносни ризици. И наместо да се даде дополнително појаснување или демант, по обичај настапи молк во Владата.

На членовите на ДУИ и онака не им паѓа на памет да ги коментираат изјавите на својот водач. Само потпретседателката Теута Арифи се обиде некако да го оправда својот партиски шеф, појаснувајќи дека изјавата не му била дадена со лоша намера.

Но, Ахмети со својата заканувачка изјава, всушност сака да испрати политички пораки на неколку адреси. Најпрво, до косовското раководство, за да им порача колку е важно да истраат на целовитоста. Потоа, до владиниот партнер Груевски за да не негува илузии дека ќе му помага ако дојде до најтешкото. Еден сигнал и до меѓународната заедница, за да ги потсети каков ризичен потег за регионот би била евентуалната поделба на Косово.

За жал, и оваа изјава на челникот на ДУИ, јасно покажа дека Албанците се уште се врзани со папочна врвца со Косово. Позагрижени се за судбината на своите браќа и за Косово, отколку за својата земја во која што живеат, работат и учествуваат во власта.