Ќе го оправи ли Тодоров здравството

Според Ѓорѓи Оровчанец, екс-министер за здравство, министерот не треба да се снаоѓа во здравството, туку треба точно да знае што е потребно да се направи

Јасмина Јовановска

„Не сум лекар и не можам да поставувам дијагнози. Дојдов да го менаџирам здравството“. Така, со оградување од обврските ја започа својата кариера како министер за здравство, Никола Тодоров. Но, ако не утврди од што боледува здравството, прашуваат лекарите, како тогаш новиот министер ��е го лекува болното здравство.

Тоа е исто како да лекуваш пациент без да се утврди од што боледува. Без разлика што не е од лекарската струка, додаваат лекарите, тој е министер кој треба да се грижи за здравјето на луѓето. А како ќе се грижи за здравјето, ако само изигрува менаџер.

Тодоров вчера беше во посета на болницата во Велес и се запозна со текот на одвивањето на реконструкцијата. Тодоров констатира дека работите за реконструкција на болницата се одвиваат во рамки на предвидената динамика, а апаратите кои се добиени се одржуваат. Министерот беше информиран и дека компјутерскиот томограф се користи интензивно односно досега истиот го користеле 60-тина пациенти.

Но на новинарско прашање како ќе се реши долгодишниот проблем со капелата во болницата, министерот Тодоров одговори оти за тоа разговарал со директорот на болницата Ванчо Граматов и додаде дека службите на Министерството во Скопје ќе направат подетална процена за колкава сума пари станува збор и кои се зафатите кои треба да се направат.

Несомнено, Тодоров ќе ја има поддршката од оние кои зависат од неговата политичка волја кога се во прашање кадровските работи, но колку ќе може самиот тој да учествува во стручните дискусии кои колку и да ги одбегнува сами ќе се наметнуваат.

Во здравството, коментираат лекарите не може да се направи остра граница меѓу здравјето и менаџирањето. Неговата функција е двојна и министерот за здравство, коментираат лекарите, мора истоверемено да биде чувар на здравјето и менаџер. Овие две улоги не можат да се поделат, зошто тие се испреплетуваат. И да не е лекар, треба најмалку да размислува како лекар, потенцират лекарите.

Како и секој нов министер за здравство, така и Тодоров вети дека приоритет ќе му бидат поквалитетна здравствена услуга за пациентите. Завршувањето на големиот проект со медицинската опрема, како и реконструкцијата на здравствените установи ќе бидат основните проекти со кои прво ќе се зафати, најави Тодоров. Но, тие се само продолжување на веќе започнатите работи од претходникот министер.

Лекарите потсетуваат дека опремата и зградите не го чинат здравството, туку здравствните работници кои подолго време се западнатите во хронично незадоволство и затоа бегаат во приватното здравство. А ако сака добро да функционира здравството и да ги задржи и оној мал број лекари, сметаат здравствените работници, на нивниот нов шеф не му останува ништо друго туку да ги испегла несогласувањата околу новиот начин на плаќање по учинок, кој се планира од идната година. Тодоров добро ќе се испоти и со најавените промени во здравственото осигурување, каде ќе треба да направи рестрикции на правата на пациентите.

А ако денот се познава по утрото, тешко дека на здрвството ќе му тргне со Тодоров. Само што седна на министерската фотелја како што дознаваме расчистил со советниците од неговиот претходник. Веројатно, затоа што е познат како министер кој си носи со себе свој тим кој победува.

Ѓорѓи Оровчанец, екс министер за здравство не верува дека новиот министер за здравство ќе може да се справи со проблемите во здравството. „Во земја како Македонија се слави смртта и задгробниот живот. Здравјето и иднината се во втор план“, смета Оровчанец.

Според него првиот лекар во државата не треба да се снајдува во здравството, туку точно да знае што прави. „А дали новиот министер знае“, прашува Оровчанец, особено затоа што тој не е е од редовите на здравствените работници и нема искуство со здравството. Тодоров одреден период работел во Глобалниот фонд на Обединетите нации кој им помага на земјите во развој во борба против СИДА, обезбедување на лекови за туберкулоза.

Но, за да се управува успешно со здравството, треба да се знаат барем основните податоци, или пак, барем малку да се почувствува горчината на здравството, укажуваат стручњаците по јавно здравство. Овде не е во прашање едукација и образование. Ако има некоја грешка во книгите за учење, ќе се препечати. Но, ако се направи грешка во здравството, тоа ќе ги чини пациентите.

На јавноста Тодоров и е познат како министер кој носи брзоплети одлуки. Тој оди на јуриш, па потоа ги исправа работите. Не е добро ако така работи и во здравството, предупредуваат личности од стручните здравствени кругови. Тодоров вели дека бил поставен да менаџира со здравство, а не да биде лекар. Премиерот Груевски, кога го промовираше Тодоров како прв лекар во државата, го пофали дека имал добро менаџерски вештини.

Останува да се види колку менаџерот ќе го опр��ви здравството. На Тодоров, сепак треба да му се даде шанса. Зошто за 20 години независно јавно здравство, ова е преседан. Прв пат во секоторот здравство, за министер е поставен човек кој не е лекар. Ред е да видиме дали човек од друга фела подобро ќе ги среди проблемите во здравството, од било кој лекар. Можеби, полесно ќе пресече онаму каде треба да се прават резови, зошто ќе гледа од чиста менаџерска позиција. Иако, тоа е многу тешко, бидејќи е во прашање сложен и чуствителен сектор.