Ставрески носи полн куфер пари од Вашингтон

ММФ и' нуди на земјава кредит до 400 милиони евра,
а СБ поддршка од 150-200 млн. евра

Александрија Стевковска


Со договорени близу 600 милиони евра поддршка за македонската економија за наредните четири години, македонската делегација, предводена од вицепремиерот и министер за финансии, Зоран Ставрески, се враќа задоволна од средбите со ММФ и со Светска банка за време на Годишното собрание на овие две институции во Вашингтон.

„Двете институции искажаа подготвеност да и' помогнат на Македонија во следниот период побрзо да излезе од кризата и да оствариме повисок економски развој. Во таа насока, посебно е значајно што двете институции за време на разговорите ветија дека со 600 милиони евра ќе ја помогнат Македонија, од кои ММФ со 400, а СБ меѓу 150 и 200 милиони евра, зависно од проектите што ќе се договорат“, изјави вицепремиерот Ставрески.

Меѓународниот монетарен фонд и' понуди на Македонија 400 милиони евра, отворена кредитна линија со камата од 1,3 отсто. Станува збор за нов инструмент на Фондот кој има цел да им помогне на земјите со здрава економска политика за полесно справување со кризата и ова е прв пат ММФ да понуди релаксиран кредит без ригорозни обврски.

„Кредитот би се наменил за справување со околности предизвикани од неочекувани тешкотии и треба да обезбеди сигурност во случај на земјата да и' е потребен поголем заем. Во случајов, тоа се 400 милиони евра, со што би се поддржала економската политика на државата“, изјави шефот на Мисијата на ММФ за Македонија, Вес Мекгру, по разговорите со македонската делегација.

Според Ставрески, новиот инструмент е инструмент на сигурност, а средствата што ќе и' бидат ставени на располагање на земјата, доколку дојде до таков договор, се петпати поголеми од квотата на Македонија во ММФ, кои земјава ќе може да ги користи, но не мора.

„Задоволни сме зашто Македонија е прва земја со која Фондот разговара за овој нов инструмент, односно е прва земја која потенцијално би можела да го добие тој нов инструмент, што е наменет за земји кои имаат здрави економски политики и кои според Фондот водат добри макроекономски политики“, истакна Ставрески.

Во следната фаза, додаде тој, ќе треба дополнително да се разговара за деталите, што ќе биде познато на следната посета на ММФ на Македонија.

Понудата на ММФ ќе биде оценета од Владата заедно со експертската јавност и со стопанствениците, а доколку Македонија се реши за неа, средствата би се користеле за реализација на владината политика за капитални инвестиции, за буџетска поддршка, како и за отплата на долгот кон странство.

Експертите оценуваат дека ваквата понуда државата не смее да ја одбие, бидејќи е исклучително поволна и претставува добар рецепт државата да престане да задолжува дома. Исто така, ова е прифатлива варијанта и за стопанствениците кои во неколку наврати изминатиот период побараа покривањето одредени средства во буџетот да се вршат преку надворешни задолжувања под поволни кредитни услови, а не преку домашно задолжување со издавање записи.

Освен понудата на 400 милиони поволен кредит, македонскиот министер за финансии се враќа од Вашингтон и со 150-200 милиони евра поддршка од Светска банка за наредните три години. Со овие пари би се поддржале проекти од областа на енергетиката, но и буџетот.

„Договорено е во првата година да се финансираат проекти во енергетиката, а тоа е далноводот од Штип до Ниш и да има буџетска поддршка за Македонија, што е одраз на тоа дека СБ ги оценува за добри политиките што ги водиме. Ќе има и еден мал проект за осигурување од климатски промени, поплави и слично, што претставуваше проблем досега кога стануваше збор за осигурување на земјоделците. СБ има нов проект, односно дизајнирано нов инструмент што ќе помогне полесно да се осигуруваат имотите“, најави Ставрески по средбата со потпретседателот на СБ за Источна Европа и Централна Азија, Филип Леру, и со директорката на СБ за Македонија, Џејн Армитаџ.

Тој додаде дека за следниот период се очекува да се подготви и проектот за изградба на Луково Поле, повторно во областа на енергетиката. „Од наша страна беше побарано и СБ одговори позитивно да се забрзаат и да се зголемат проектите во енергетиката, бидејќи тоа е една од клучните области за Македонија и за развојот на земјата и задоволен сум што добивме од банката потврда дека ќе учествува во овие проекти заедно со Владата“, рече Ставрески.