Лидер според висина на даноците

Лондон - На заработувачка од 100.000 долари најголем данок ќе платите во Хрватска - 54 отсто, објави лондонски „Економист“, кој направи пресметка врз основа на податоците од јули годинава. „Економист“ направи анализа на даночните закони во 81 земја. Како што се очекувало, врвот на листата го зазедоа европските земји, а првото место по висината на даноците и' припадна на Хрватска.

На заработувачка од 100.000 долари, Хрватите мора да платат околу 54 отсто данок од кои поголем дел (околу 34 отсто) отпаѓа на данокот на доход, додека останатото се наплатува во придонеси, пренесе Интернет-порталот СЕЕбиз.еу. Најмногу простор за дополнително оданочување имаат земјите каде што се наоѓаат големи банковни центри или држави кои ја темелат својата економија првенствено на нафта. Европските држави, тешко можат себеси да си дозволат луксуз оптоварување на граѓаните со дополнителни даноци. На второто место на листата е Унгарија, чии граѓани на 100.000 долари профит вкупно плаќаат околу 48 отсто данок, односно околу шест отсто помалку од Хрватите. Во Унгарија, меѓутоа, се плаќа поголем данок на доход отколку во Хрватска, додека значително помалку се издвојува за придонеси. (МИА)