Финансиските лидери не успеаја да ги решат валутните спорови

Глобалната економија и натаму се извлекува од најлошата рецесијa

Вашингтон - Светските финансиски лидери не успеаја да ги решат големите валутни недоразбирања, кои се закануваат да доведат до започнување вистинска валутна војна. Најостри несогласувања околу валутниот курс имаат САД и Кина. САД тврдат дека јуанот е потценет и ја повикуваат Кина да го остави курсот на својата национална валута да се зголеми.

„Голем број држави водат политика на девалвација на својата национална валута со цел да го зголемат извозот и да создадат работни места во една тешка економска ситуација“, сметаат учесниците на годишната средба на Меѓународниот монетарен фонд во Вашингтон, која заврши со коминике, во кое Фондот вети дека ќе ја задлабочи својата дејност во областа на движењето на валутните курсови.

Земјите-членки на ММФ ја повикаа оваа меѓународна финансиска институција да ја задлабочи својата работа во врска со прашањето за дисбалансите на светската економија, посебно меѓу курсовите на одредени валути, без да се договорат за конкретни мерки. Во склоп на овој проблем, извршниот директор на ММФ, Доминик Штрос-Кан, ги повика државите да престанат да го користат валутниот курс како средство за остварување на економската предност и се заложи за здружен напор во обновата на светската економија. „Глобалната економија и натаму се извлекува од најлошата рецесија од Втората светска војна и ако не се забрза отворањето нови работни места, младите луѓе нема да можат да се вработат“, изјави Штрос-Кан. „Економскиот раст се враќа, но сите знаеме дека е кревок и нерамномерен“, рече тој и предупреди дека прекинот на соработката меѓу државите ќе претставува посебна закана за закрепнувањето. Според него, без поголема соработка, глобалната економија и натаму ќе биде во проблеми и ќе се отворат малку нови работни места.

Шефот на ММФ потсети дека од почетокот на рецесијата во 2007 година во светот се изгубени повеќе од 30 милиони работни места. (МИА)