Македонија покажа добар фудбал на мечот со Луксембург
Горан Пандев постигна два, а Гроздановски и Наумоски по еден гол против Луксембург
Емил Китановски
Фудбалската репрезентација на Македонија завчеравечер го положи последниот тест пред почетокот на есенските квалификации за СП, и во нерамноправен дуел оствари убедлива победа од 4:1 против аматерскиот состав на Луксембург. Пандев и другарите беа на висина на задачата во Луксембург, делуваа полетно, мудро и тактички комплетно го надиграа слабиот противник. Сепак, да не заборавиме дека според квалитетот кој што го поседува, составот на Луксембург, ниту оддалеку не може да се спореди со тимот на Шкотска, нашиот прв противник во квалификациите, па затоа оваа победа не треба многу да не залажува.
„Во одличен ритам одигравме две третини од натпреварот. Се' течеше според однапред договореното, и сите играчи беа на потребното ниво“, изјави веднаш по завршувањето на дуелот, селекторот Среќко Катанец. „Мислам дека доколку и на следните мечеви продолжиме да играме во ваков стил, не очекува светла иднина, и повеќе добри резултати на следните мечеви. Сега наш прв приоритет е дуелот со селекцијата на Шкотска, и сите сили треба да ги насочиме во тој правец“, заклучи словенечкиот стратег.
На првата поубедлива победа на еден пријателски меч одигран во гости прописно се изначекавме. Четирите голови во мрежата на Луксембург се добра причина за оптимизам во редовите на нашата селекција, меѓутоа и обврска повеќе за фудбалерите, за петнаесетина дена да не дозволиме лесно да го издевалвираме успехот од пред два дена.
Инаку, прва личност во нашиот тим на оваа средба беше Горан Пандев. Нашиот најдобар интернационалец постигна два гола, првиот во 6. минута по грешката на Хофман кога од само шест метри упати бомба кон голот на Жуберт, а вториот во 44. минута кога по неговиот шут од 16 метри топката закачи еден од домашните фудбалери, го смени правецот и заврши во мрежата на Луксембург. Останатите два гола за нашиот тим во апсолутната доминација на репрезентацијата на Македонија ги постигнаа Гроздановски во 33. минута по одличното двојно проигрување со Илчо Наумоски, и овој вториот во 49. минута кога одлично го искористи центаршутот на Пандев и со прецизен удар со глава ја смести топката во мрежата на Жуберт.
Честа на домашната екипа ја спаси Китенге во 73. минута, кога го искористи центаршутот на Муч од левата страна и со прецизен удар го постави конечниот резултат 4:1 за репрезентацијата на Македонија.
Луксембург, стадион: Жози Бартел. Гледачи: 2.000, главен судија: Бругер (Австрија). Стрелци: Китенге 73 (Луксембург) и Пандев 6 и 44, Гроздановски 33 и наумоски 49. минута (Македонија).
Луксембург: Жуберт, Кинцингер, Грајсбуш (Саграмола), Хофман, Рајтер, Петерс, Страсер (Паја), Батмер (Китенге), Левек (Дамота), Јоаким (Жерсон), Муч.
Македонија: Милошевски (Пачовски), Новески (Вајс), Митрески, Седлоски, Попов (Петров), Лазаревски (Положани), Шумуликовски, Гроздановски, Пандев, Наумоски, Мазнов (Тасевски). |
