Претходен број

Поглед

Задоволството на Циле

Роберт Димитриевски

„Јас сум задоволен, затоа што тоа што го очекувавме апсолутно се оствари“, е првиот коментар на претседателот на Македонскиот олимписки комитет, Васил Тупурковски, за настапот на седумтемина наши спортисти на ОИ во Пекинг. Според изјавата за Интернет-порталот „Кирилица“, популарниот Циле дури е и „потполно задоволен“, бидејќи „имавме и две победи на боречкиот турнир“!?

Да не е смешно, би било трагично. Место барем трошка самокритика, првиот човек на „врховната“ спортска институција уште вели дека резултатите на Игрите ни се реални, а ренесансата треба да ја очекуваме од септември, кога ќе почнело спроведувањето на стратегијата за развој на спортот во Македонија. Таа да ти била усвоена во март, по двегодишна анализа и работа на сите стручни спортски потенцијали во државата.

Ако спортската реалност ни е ваква, значи никаква, тогаш не само што нема место за задоволство, туку императив е таа веднаш да почне да се менува, и тоа почнувајќи од врвот. Челниците на МОК, на чело со Тупурковски, имаа четири олимписки циклуса и учество на пет летни олимпијади по формирањето на Комитетот во 1992 година, а резултатот им е поразителен. Македонија како дел на некогашна СФР Југославија даде 26 олимпијци, кои донесоа вкупно 12 медали од осум олимписки игри, а по осамостојувањето продефилираа 30-мина спортисти, а само борачот Могамед Ибрагимов освои медал, и тоа бронзен, во Сиднеј 2000.

Резултатите се единствениот меродавен показател за ефектот од нечиј вложен труд, а нашиот најголем „успех“ во Пекинг беше сликањето на генералниот секретар на МОК, Сашо Поповски, со шал со натпис „Македонија“ близу американскиот претседател Џорџ Буш на трибините.