Претходен број

Си велам

Колку Црвенковски е црн, а колку Груевски е црвен

Ерол Ризаов

И по 20 години тие ќе бидат главни играчи ако ја зачуваат државата и себеси

Бранко Црвенковски и Никола Груевски, нашиот претседател и нашиот премиер, се главните годишноодморски ѕвезди. Летово не можете да ги одминете. Не ги потисна ни Олимпијадата, ни светските рекорди, ни руската интервенција во Осетија и Грузија, ни летните пожари, ни жештините, ни за првпат убавите охридски плажи.

За да бидат овие двајца највисоки македонски политичари во центарот на вниманието се грижат стотици телевизиски и радиостаници, десетици национални и исто толку локални весници, списанија... За тоа водат сметка секој миг десетици луѓе од партиските штабови, од владини и невладини организации, универзитетски професори, деловни луѓе, новинари, уредници, разни советници, аналитичари, колумнисти, дипломати, странски и домашни, меѓународната заедница и традиционално бескрајните кафеански муабети. Многу луѓе макотрпно работат само да смислат како Црвенковски и Груевски да станат прва вест, а потоа уште поважно како едниот да биде добрата вест, а другиот лошата вест. Ловот е по малкуте преостанати неопределени рамнодушни и партиски неинфицирани. На веќе определените груевисти и бранковисти тешко можат да влијаат какви било информации. Тие во своите лидери гледаат господ. Меѓусебните напади се жестоки со јазик на омраза и нетрпеливост.

А во суштина ниту Бранко Црвенковски е толку црвен, ниту пак Груевски е толку црн. Поточно и двајцата најекспонирани македонски политичари се прилично добро офарбани со повеќе нијанси и разни бои. Иако идеолошки припаѓаат на левицата и на десницата, на најспротивставените страни, спектарот на боите им е многу сличен. Во виножитото на Груевски ќе откриете силна црвена левичарска нијанса препознатлива по жестоката кампања против криминалот и корупцијата, незаконско богатење, криминална приватизација, грижа за сиромашните, отворање социјални кујни и домови, субвенции за земјоделците, подобра здравствена заштита, подобро образование, зголемување на пензиите, поголеми плати на администрацијата, стипендии, компјутер за секое дете... Главно, доктрина од арсеналот на тврдата левица.

А кај Црвенковски црните бои се потемни отколку кај десничарот Груевски и поблиску до демохристијанската идеологија, отколку до социјалдемократската. Најголемите хитови на Црвенковски летово се загриженост за стратегиските интереси на државата, за влез во НАТО и Европската унија, издигнување на државните интереси над партиските, високи патриотски и национални цели за одржување на реформскиот курс и на демократските придобивки, либерална економија, остра борба против прекршување на демократската процедура, за заштита на правната држава, заштита на човековите права и слободи, пресумпција на невиност, главно пропаганден арсенал својствен за крајната десница. Околу уставното име на државата двајцата политичари се крајно внимателни и воздржани, иако кај Црвенковски е повидлива определбата за прифатлива отстапка во замена за членство во НАТО и преговори со ЕУ.

И Груевски и Црвенковски по многу нешта се атипични македонски политичари. Ни најмалку не се случајно таму каде што се наоѓаат и ако се погледаат нивните биографии и движењето во политичката кариера ќе се види дека станува збор за исклучително прагматични политичари кои најверојатно уште долго ќе бидат присутни на самиот врв на македонската политичка сцена. Груевски со своите 36 години, а веќе 12 години политички стаж, во моментов е во далеку поповолна позиција, а Црвенковски со своите 45 години и речиси 20 години на политичка сцена во Македонија рано е да заврши, а дека не му е тешко да почне повторно самиот најави на голема врата.

Тие што го потценуваат Груевски или забораваат или губат од предвид дека во изминатите 12 години во политиката успеа да изгради свој специфичен имиџ. Во ВМРО-ДПМНЕ ја нема харизмата како што беше во почетокот Љупчо Георгиевски, го нема неговото лидерство, но ужива голема поддршка и симпатии не само кај гласачите на ВМРО-ДПМНЕ туку ја стекна довербата и на најголемиот дел незадоволни и разочарани граѓани во македонската транзиција. Груевски во македонската политика наметна нови стандарди. Постојана и силна предизборна кампања од првиот ден. Постојано мерење на расположението на јавноста и на рејтингот. Силен и често примитивен популизам. Делење буџетски пари за строго определени целни групи: администрација, земјоделци, пензионери, студенти. Копање по античката историја и блиски релации со меѓународно афирмираните македонски дејци. Тие што го потценуваат Груевски не смеат да заборават дека тој ја победи иконата на ВМРО-ДПМНЕ и основачот на оваа партија, првиот македонски лидер на десницата, Љупчо Георгиевски. Таа победа колку и да е помогната од страна може да ја добие само фајтер подготвен на се' или ништо во политичката пресметка. Главен негов адут беше што Груевски брзо сфати дека Георгиевски ја губи меѓународната поддршка.

Изненадува сегашниот однос на Груевски кон меѓународниот фактор и потценувањето на неговото влијание. Она што лесно го заработува на домашната политичка сцена уште полесно го губи на меѓународната.

Бранко Црвенковски веќе најави дека по претседателскиот мандат останува во политиката и дека е подготвен повторно да тргне од почеток. Иако во моментов е со многу понизок рејтинг од Груевски и со помала поддршка во јавноста, Црвенковски е политичар кој знае да ја врати довербата. Политичката кариера Бранко Црвенковски не сака да ја заврши на 45 години. Тој ќе се бори жестоко повторно за премиерската функција или поточно да го порази Груевски.

Самата помисла дека Црвенковски може да се врати на премиерската позиција кај многумина внесува паника и жестока одбивност и тоа не само кај партиски загрижените луѓе туку и кај голем број негови некогашни следбеници и поддржувачи. Тие во Црвенковски препознаваат главен виновник за грешките и неуспесите на македонската долга и мачна транзиција. Најжестоките критичари на Бранко Црвенковски веќе подолг период се луѓе кои некогаш биле многу блиски до него, беа негови министри во два или три мандати, беа негови лични пријатели, директори и сопственици на значајни и влијателни компании, на медиуми, институции на системот, новинари, уредници. Некои од нив кои му пишуваа оди и го нарекуваа државник кој се раѓа еднаш на сто или илјада години, сега се негови најголеми судии. Сега епитетите за историски дострели му ги пеат на Груевски. Дали е во прашање синдромот на напуштена љубовница кај овие луѓе, или пак навистина тие биле толку блиску до Црвенковски и толку добро го познавале и го познаваат што можат да го видат она што не можат да го видат обичните луѓе - тешко е да се одговори.

И Црвенковски е политичар кој не смее да се потцени. Особено кога е слаб. Со својата појава, ораторство, сп��собност за комуникација, истанчен усет за пулсот на јавноста, остава впечаток на врвен политичар кој знае да прими, но и да зададе силни удари. И Црвенковски знае дека политиката е ринг на кој се губи и добива. Но, се случуваат пресврти и непредвидливи работи кои ќе зависат само од јачината.

Со сиот ризик предвидувам дека овие двајца политичари и во наредните 20 години ќе бидат главни играчи на политичката сцена во Македонија ако ја зачуваат државата и, се разбира, себеси.