Ги слуша ли полицијата апелите на ИВЗ?

Од МВР вчера повторија дека во континуитет ja следат состојбата со ширењето на радикалниот ислам

Светлана Унковска


Барањето на поглаварот на Исламската верска заедница реис-ул-улема Хаџи Сулејман ефенди Реџепи, кој реши јавно да побара и од надлежните државни институции, но и од САД и од ЕУ да направат се' што е можно да се запре ширењето на радикалниот исламизам во земјава укажува на сериозноста од постоењето на овој проблем.

За опасноста од вахабизмот во земјава се чини дека единствено е за��рижен поглаварот Реџепи, кој со својот настап го отвора прашањето зошто и покрај тоа што се' упатува на постоењето на оваа закана, не се презема ништо за справување и негово пресекување во корен пред да добие замав. Поглаварот Реџепи, кој отворено проговори за верскиот фундаментализам во земјава дури откако се случи инцидентот во Иса-бег џамијата пред околу три месеци, сега веќе јасно укажува дека тоа може сериозно да ја загрози и нашава земја. Како главен предводник во ширењето на фундаментализмот тој го посочува контроверзниот оџа Рамадан Рамадани, кој беше разрешен од Скопското муфтиство. Тој обвинува, пак, дека главниот проблем и опасност од екстремизмот лежи во нефункционирањето и корумпираноста на ИВЗ.

Од МВР вчера повторија дека тие во континуитет ги следат состојбата со ширењето на радикалниот ислам во земјава.

„МВР секогаш стои и ќе стои на располагање на ИВЗ за соработка при решавање на проблемите со кои се соочува. Од овој аспект, МВР во континуитет ја следи состојбата со ширењето на радикалниот ислам и доколку има какви било сомненија или релевантни сознанија за сторени кривични дела, МВР е подготвено да интервенира. Сепак, мораме да укажеме дека МВР не смее да се меша во внатрешните состојби и односите на верските заедници, а од друга страна ние ќе постапиме во момент кога ќе има релевантни сознанија за какво било кривично дело“, ни изјави портпаролот на МВР, Иво Котески. Тој не сакаше да прецизира дали со тоа што велат дека тие ги следат во континуитет состојбите укажува на фактот дека вахабизмот, сепак, се шири и ја доведува во опасност нашава земја, на што укажува и поглаварот.

Поради чувствителноста на ова прашање, голем број од познавачите на состојбите одбиваат јавно да говорат, но, сепак, укажуваат дека главниот проблем во ширење на фундаментализмот е мешањето на политиката преку судирот на интересите на двете поголеми партии на Албанците, ДПА и ДУИ. Покрај големото влијание врз граѓаните преку нивно присуство во ИВЗ, се тврди и дека голем е интересот за средствата кои ИВЗ ги добива како донации од голем број арапски земји.

Како главен предводник во ширење на радикалниот ислам и криминалот, ИВЗ го посочува Рамадан Рамадани, кој беше суспендиран од страна на Скопското муфтиство. ИВЗ уште веднаш го обвини дека тој го шири фундаментализмот во земјава и дека финансиски бил поддржан од криминални структури.

Рамадани вчера во изјава за „Утрински весник“ рече дека барањето на поглаварот Реџепи тој ја гледа како еден вид соработка со министерот за внатрешни работи на Србија, кој упорно сакал да докаже дека Македонија е проблематична земја и обвини дека за тоа е виновна корумпираноста на ИВЗ, која примала пари од неколку земји, како што се, на пример, Либија и Саудиска Арабија.

„Секаде во исламскиот свет основната подлога на екстремизмот е корумпирана и нефункционална верска заедница. Ако продолжи поглавар да биде Сулејман Реџепи, постои ризик ИВЗ да биде доведена во колапс и тогаш ќе се појават екстремни групи што ќе и' наштетат на нашава земја“, вели Рамадани. Според него, поглаварот Сулејман Реџепи мора да биде симнат од ИВЗ, за кое досега од верниците има собрано околу 7.200 потписи. Иако е тоа само 25 отсто од вкупното албанско население што живе во Скопје, сепак, е убеден дека ќе биде доволно за да побара негова смена.

Рамадани убедува дека во досегашните негови активности воопшто немал поврзаност со никакви фундаменталисти и дека не ширел радикален ислам преку предавања што се вршат во некои скопски џамии. Познато е дека во Иса-бег џамијата од каде што тој беше разрешен, како и џамиите Јахја-паша, Султан Мурат, Алаџа и Тутунсус, веќе подолго време се тврди дека се упоришта на вахабистите кои преку проповеди шират радикален исламизам и тоа преку придобивање млади кои се учат да ги прифаќаат обичаите, однесувањето и начинот на облекување.