Матичните датотеки за пензии можност за манипулација
Многу забелешки за работата во подрачните единици на ПИОМ
Постапката за старосна пензија што се води во подрачните единици на ПИОМ е со пропусти и без внатрешна контрола. Поради ова, постои ризик за манипулација со податоците за годините на работен стаж и стекнување пензија. Ова го констатира државниот ревизор, кој направи контрола на 253 пензиски предмети во подрачните единици на ПИОМ во Скопје, Штип, Кочани, Струмица, Гевгелија, Охрид, Струга и Битола. Според извештајот, упатството за остварување пензија има контролни недостатоци во неколку фази од постапката. Матичните датотеки се така организирани што може да се дополнуваат и менуваат податоците.
Електронските датотеки не содржат комплетни и навремени информации со кои ќе се потврдат вистинитоста, комплетноста и точноста на решенијата за пензија. Начинот на чување на М-пријавите до нивно пренесување во електронска форма е недоволно сигурен и постои ризик од губење и уништување, констатираат ревизорите.
Кај 26 отсто од предметите е констатирана разлика во податоците за впишан работен стаж во работничката книшка со податоците од матичните датотеки. Во 48 отсто од предметите не е приложен или испечатен документ за преглед на податоци, со што има можност да се внесат дополнително податоци за години работен стаж, плати и надоместоци со датум и пред поднесување на барањето за пензија, за кое не е потребно приложување дополнителна документација. Со ова сумираниот преглед на вкупниот работен стаж, кој е основа за висина на пензија, може да има невистинити податоци. Кај 48 отсто од вкупно ревидираните предмети конечниот документ за пензија не е авторизиран од матичарот. Комплетирањето на документите го врши едно лице, со што постои ризик внесените податоци в�� датотеката да не се реални. Во Скопје е задолжено едно лице да врши контрола на податоците, и тоа на папката на предметот, но не и на секој документ посебно. Во другите подрачни единици нема контролори.
Контролите утврдиле дека ако не се совпаѓаат податоците од матичните датотеки со оние од електронските датотеки, повратната информација може да патува и со години. Поради ова, навремената корекција се врши со задоцнување или воопшто не се врши. (Ј.Ј.) |
