Претходен број

Поддршката за ВМРО-ДПМНЕ - 27,8 отсто, за СДСМ - 10,2

Доколку утре се одржат парламентарни избори, за ВМРО-ДПМНЕ би гласале 27,8 проценти, за СДСМ - 10,2, за ДУИ - 8,6 и за ДПА - 2,5 проценти од граѓаните, покажува анкетата на Институтот за демократија спроведена меѓу 28 и 30 ноември и на 1 декември. Довербата за останатите партии е под еден процент. Околу 26 проценти од анкетираните немале одговор на прашањето, а 21 отсто не би гласале за ниту една партија

Истражувањето е спроведено на стандардизиран прашалник и врз основа на стратификуван примерок кој е репрезентативен за населението во Македонија, а со него биле опфатени 1.110 испитаници во сите шест изборни единици.

Според резултатите од анкетата, нема поместување во рејтингот на партиите од претходното испитување спроведено во септември.

Најголема доверба меѓу политичарите и во претходното истражување на Институтот за демократија има премиерот Никола Груевски, за кого се изјасниле 30,7 проценти од испитаниците. Втор на листата е лидерот на ДУИ Али Ахмети со 8,3 проценти, а трет е претседателот Бранко Црвенковски со 8,2 проценти.

Од актуелните прашања за најголем процент од испитаниците (45 отсто), укинувањето на визите е најважна работа. Следуваат добивањето датум за преговори со ЕУ, кое е важно за 30,3 отсто од анкетираните, и влезот во НАТО за што се определиле 18,6 отсто.

Потегот на Владата за поднесување тужба против Грција пред Меѓународниот суд на правдата во Хаг го поддржуваат 62,8 проценти од анкетираните, 18 не го поддржуваат, а 19,2 немаат став за ова прашање.

Генерално, повеќе од половината или 50,2 проценти оцениле дека Македонија се движи во позитивна насока, за 28,1 државата оди во негативна насока, а 19,7 проценти немаат одговор. (МИА)