Дојчин Цветановски ја продолжува битката, сега со пријави
Штрајкот заврши, сега и државата и СОНК подготвуваат кривични пријави
Жаклина Хаџи-Зафирова
Синдикалниот лидер Дојчин Цветановски нема да се повлече од функцијата се' додека не се процесуира и последната пријава што СОНК ќе ја поднесе против најмалку дваесетина директори на основни и на средни училишта, за кои велат дека бројката е многу поголема. СОНК подготвува списоци на директори кои сериозно го прекршиле правото на штрајк. Тие ќе се достават до градоначалниците од кои, исто така, ќе се бара кривична одговорност. Пријави ќе има и за просветните инспектори кои за време на штрајкот ги „чешлаа“ училиштата.
Но, СОНК не се единствените каде што се подготвуваат кривични пријави. Пријави подготвуваат и просветните инспектори, но за наставниците кои штрајкувале и го попречиле наставниот процес.
Пријавите, сепак, не се единственото нешто околу кое двете засегнати страни имаат спротивставени ставови. Нивните ставови се разликуваат и околу прашањето за тоа како да се надомести изгубената настава. Се отвора ли со тоа нов фронт меѓу СОНК и Владата, чии претставници вчера почнаа да ги разработуваат деталите од потпишаната спогодба со која се стави крај на штрајкот во училиштата?
Синдикалниот лидер Дојчин Цветановски и министерот за образование и наука, Перо Стојановски, на вчерашната средба се согласија прашањето за изгубената настава да го одложат за понатаму. Двете страни имаат различни позиции околу ова прашање. Цветановски тврди дека настава не треба да има, додека министерот за образование вчера изјави дека ќе се направи пресек каде имало, а каде немало настава, бидејќи според законот во училиштата мора да има 180 работни дена. Министерот Стојановски, како и премиерот, задоволен е од постигнатиот договор со СОНК. На средбата со Цветановски се договориле да почнат со работа комисиите за утврдување на колективните договори за високо образование и наука.
Наспроти изјавите на премиерот за сериозни отстапки, Цветановски вчера изјави дека не направиле сериозни отстапки. „Попуштивме ние, но попуштија и тие“, вели тој, потенцирајќи дека не бил убеден дека немало доволно пари во буџетот за исполнување на нивните барања. Објаснувањето од Владата дека немаат доволно пари да ги задоволат барањата на СОНК тој ги објаснува како грешка во проекциите на буџетот кои, според него, биле правени кабинетски.
Цветановски коментира дека не извлекле максимум со барањата, иако ги омекнале тврдите ставови на Владата која претходно им понуди само исплата на храна од 1 јануари 2010 година и трансформација на работниот однос, додека не станало збор за колективните договори.
„Овој компромис ни случајно не е предавство на членовите. Извлековме нешто што е многу повеќе од она што ни беше понудено“, ни изјави Цветановски, кој вели дека не се чувствува изманипулирано.
Деновиве СОНК подготвува пријави за директорите кои вршеле различни притисоци на наставниците. Физички пресметки немало за време на штрајкот, но имало тегнење за раце, вели Цветановски. Директори биле заклучувани во канцеларии, а најпикантниот случај бил со едно скопско училиште кога децата биле заклучени во училница, па морале да излегуваат низ прозорец. За сите овие случаи СОНК ќе поднесе пријави, а ќе бара одговорност и од првите луѓе на општините.
„Ќе има кривични пријави за најмалку дваесетина директори кои излегоа на телевизија со свои изјави, иако има и еден куп кои јавноста не ги виде. Тоа е знак дека со училиштата раководат луѓе кои прашање е дали воопшто треба да се занимаваат со воспитно-образовниот процес“, објаснува Цветановски.
Во врска со најавите од Просветниот инспекторат дека и тие ќе поднесат пријави, но против наставниците, Цветановски рече: „Едвај чекам да поднесат пријави, бидејќи тие ќе бидат основа за кршење на уставното право и ќе служат само како дополнителна документација на пријавите кои ние ќе ги поднесеме против нив“. |
