Масовна тепачка во Охрид за песна

Нова масовна тепачка го наруши јавниот ред и мир во Охрид. Во инцидентот што се случи вчераутро учествувале петмина, кои започнале тепачка поради музика.

Според охридската полиција, се' започнало на прославата на Бајрам во студентскиот дом „Никола Карев“, каде што имало организирана празнична забава. Еден од учесниците на забавата побарал да му свират песна, но желбата не му била исполнета, по што настанала расправија. Вербалниот конфликт прераснал во тепачка во која учествувале и двајца браќа од Република Србија со привремен престој во Охрид.

Набргу била повикана полицијата, но при обидот да го приведат А.К., службените лица биле вербално нападнати од неговиот брат Б.К., како и од уште едно лице. „Тие физички ги нападнале и ги влечеле полициските службеници за униформата. Притоа, сакајќи да избега, А.К.  со нога удрил еден полицаец во стомак“, информираат од МВР. Во инцидентот било оштетено и едно полициско возило. Полицијата ги привела двајцата браќа и уште едно лице, а трага по уште двајца учесници во тепачката, кои избегале веднаш по инцидентот.

Ова е втор инцидент во Охрид што се случи за време на празниците. Полицајци при интервенција беа нападнати и пред кабарето „Даг“ кога биле повикани да интервенираат при масовна тепачка на група охриѓани. (Х.Р.)