Спектаклот „Да, и водата гори“ за крај на МОТ
Ова е централниот настан на „Бела ноќ“, во чии рамки ќе има и изложби, концерти и перформанси
Пиротехничкиот спектакл „Да, и водата гори“, со чија изведба вечерва, во 21 часот, на плоштадот „Македонија“, свечено ќе се затвори МОТ, е централната манифестација на „Бела ноќ“, во чии рамки ќе се случат серија изложби, концерти, перформанси, спектакли и модна ревија.
Отворањето, на оваа четврта по ред „Бела ноќ“, ќе биде во 20.15 часот пред Музејот на град Скопје од каде тргнува целата манифестација придвижувајќи се кон централниот настан на плоштадот, каде германската трупа „Фламен“ ќе го изведе пиротехничкиот и акробатски спектакл „Да, и водата гори“. Станува збор за получасовен атрактивен перформанс со 8 актери – акробати во чиј фокусот се водата и огнот, и начинот како да се зближат овие две спротивни сили.
Во случај на неповолни временски услови сите манифестации во рамките на „Бела ноќ“ предвидени на отворен простор, освен спектаклот „Да, и водата гори“ и полноќната ревија ќе бидат префрлени во затворен простор. Влезот на сите настани во рамки на манифестацијата ќе биде слободен. (Л.М.) |
