Азилантскиот бран стигна до ЕП

Група европарламентарци прашаа што прават Македонија и Србија за да нема злоупотреба на безвизниот режим

Европскиот парламент расправаше за спроведувањето на визната либерализација од страна на Македонија, Србија и Црна Гора, во пресрет на почетокот на укинувањето визен режим од страна на ЕУ за уште две земји од регионот, Албанија и Босна и Херцеговина.

Дискусијата ја поведоа група европарламентарци од десницата што побараа информација како земјите што лани добија визна либерализација, пред се', Македонија и Србија, ја спроведуваат либерализацијата и дали ги преземаат сите мерки за да се спречи нејзина злоупотреба. Пратеничкото прашање следуваше како реакција на вклучувањето аларм во неколку земји од Европската унија, меѓу кои Германија, Шведска и Белгија, на повеќекратното зголемување на бројот баратели на азил од Македонија и од Србија по укинувањето на визите.

Во прилог на тоа оди и последното враќање на полн авион баратели на азил од Германија, во неделата, на кои германските власти им ги одбиле барањата.

Европската десница изминатите месеци беше најгласна во критиките за злоупотребата на визниот режим од страна на двете држави, со укажувања дека мерките што ги преземаат властите не се доволни. Тие во неколку наврати бараа властите подобро да ги информираат граѓаните што значи визна либерализација и да преземат, пред се', економски мерки со кои ќе ги одвратат граѓаните од емиграција и барање азил во европските држави. Некои од пратениците изминатите месеци отворено говореа и за враќање на визниот режим за Македонија и за Србија.

Еврокомесарот за правда и внатрешни работи, Сесилија Малстром, на прашањето од европратениците одговори дека земјите „треба да преземат соодветни мерки за да нема злоупотреба на системот“. Таа рече дека биле преземени соодветни мерки за соочување со ситуацијата, како и тоа дека и властите на двете земји презеле одредени мерки, а предвидени се и нови кампањи за информирање и запознавање на граѓаните што значи безвизен режим. Според Малстром, првата официјална процена на безвизниот режим ќе биде направена во јуни 2011 година. (Т.Г.)