„Кока-кола“ и здолништа место аргументи!

Заседанието покажа дека пратениците не само што го допреа дното туку ископаа и неколку метри под нивото

Оливера Војновска

До каде може да се спушти нивото на комуникација и имаат ли граница примитивизмот и ниските удари како неизоставен дел од македонската политика? Заседанието за распуштање на парламентот, кое се развлече до раните утрински часови и беше прекинато за да не резултира со уште еден циркус, за жал, покажа дека нашите политички претставници не само што го допреа дното туку и ископаа неколку метри под нивото. Освен навредливи зборови, етикетирање и огромна доза на патетика и на загриженост за судбината на народот и иднината на Македонија, не слушнавме аргументи „про“ и „контра“ предвремените избори. Но, дефинитивно, стана јасно дека е најдобро наместо да чекаат директива од партиските централи, доброволно да ги вратат мандатите и да се самораспуштат!

Собраниската говорница стена од купиштата навреди рафално искажани во надојдениот порив за омаловажување. Пратениците целосно се заборавија. Се конфронтираа на лична основаа и притоа воопшто не се избираа зборови за да се понижи противникот. Дури и по цена на таков начин да се избламираат себеси, а пред се', институцијата што ја претставуваат.

Пратеничката Весна Бендевска од СДСМ за да ја расчисти дилемата зошто нејзиниот колега од ВМРО-ДПМНЕ Васко Шутаров се плаши од избори, директно го праша каде му е храброста, а веројатно, за да го засили впечатокот имаше и потпрашање: „Да не ви треба здолниште?“.

На Бендевска изгледа не и' се допаднаа поговорките што ги раскажа Шутаров за да објасни зошто СДСМ се плашел од избори. „Во тенџере вари, од капакот јади. Вие сакате во капакот да варите, а од тенџерето да јадете“. „Не почнувајте игра на мачка и глушец се' додека не сте сигурни дека не сте престанале да бидете глушец“. „Во Босна велат - оди во џамија помош да бара, а во прегратки прасе им носи“. Точно така, ќе констатира Шутаров, „ барате избори, а се плашите од избори како ѓавол од крст“.

Неговата партиска колешка Анета Стефановска во нејзиниот добро препознатлив манир и' се обрати на Бендевска: „Почитувана госпоѓо Бедовска, односно Бендевска, се извинувам...“

Трагикомичната претстава во Собранието немаше да биде целосна без Амди Бајрам. „Легенрадниот“ пратеник од Сојузот на Ромите прво на СДСМ им кажа дека бадијала блефираат дека сакаат предвремени избори и им откри дека од сигурни и проверени извори го знае точниот датум на одржување на парламентарните избори: на 2.2.2012 година! Потоа, онака како што само тој знае, в лице им кажа дека не ги бива! Дури и да има предвремени избори повторно убедливо ќе изгубат, бидејќи немаат рејтинг меѓу народот. Како пример за илустрација го зема потпретседателот на Собранието, Јани Макрадули, кој според него, „ е одвратна личност која никој не ја познава“. Но, тоа не беше се'. Бајрам излезе со конкретен предлог до Макрадули: „ Да се обложиме дека доколку сега излеземе на улица, мене ќе ме поздрават 100 луѓе, а тебе никој. Јас сум за тебе кока-кола“!

Спикерот Трајко Вељаноски по 14-часовна расправија утрото во еден часот ја прекина седницата. Продолжението беше најавено за вчера попладне во 16 часот. Исходот е извесен – владејачкото мнозинство е против вонредни парламентарни избори. Неизвесно е дали пратениците ќе дојдат на седница со студени глави или следува ново продолжение од циркузијадата „распуштање на Собранието“.