Борците навредени од Груевски

Учесниците во НОВ се навредени од премиерот Никола Груевски, кој го споредил маршот на СДСМ со доаѓањето на комунистите на власт. Скопскиот одбор на СБМ реагира дека владејачката ВМРО-ДПМНЕ го минимизира нивниот придонес за извојуваната слобода на македонскиот народ.

Според борците, „врв на таа негативна оцена за победоносната НОБ е изјавата на премиерот, по протестниот марш за одбрана на демократијата, дека СДСМ ги напаѓал институциите за насилно уривање на власта и оти тоа не ги изненадило, бидејќи тие биле наследници на КПМ, а се знае како комунистите дошле на власт, алудирајќи дека тоа е сторено со терор и насилство“.

„Ваквиот став го навредува секој учесник во НОАВМ. Тоа не може да биде став на одговорен политичар. Веруваме дека тоа не е став и на голем дел членови на неговата партија, бидејќи и нивните татковци и дедовци учествуваа во таа тешка борба“, се наведува во реакцијата на Дебатниот клуб на СБМ.