Промовирано списанието „Правен дијалог“

Европската конвенција за човекови права теоретски се прифаќа дека е извор на домашното право, но се' уште малку се користи, беше речено на вчерашната дебата на која беше промовирано списанието „Правен дијалог“. Независното судство, процесот на денационализација, правото на слободен пристап до информациите од јавен карактер и неговата заштита, правото на жалба во управен спор се дел од темите опфатени во првото издание на списанието,што вчера го промовираше Институтот за човекови права во соработка со Мисијата на ОБСЕ во Скопје.

Основна идеја, според судијата Маргарита Цаца-Николовска од Институтот за човекови права, е да се презентираат размислувањата и да се направи дискусија за актуелни теми што ги засегнуваат правата и слободите на граѓаните во Македонија. „Правните написи играат голема улога во развојот на демократските процеси во секое општество и преку нив влијаеме врз развојот на правната мисла и практика, како и нивниот квалитет“, смета Цаца-Николовска, додавајќи дека критичкиот пристап во Македонија последните години е значително намален.

Намерата на Институтот, како што појасни, е преку правниот дијалог да се искажат ставовите, да се дадат продуктивни забелешки по одредени актуелни правни прашања и законски новини, со што ќе се придонесе за зголемување на конструктивната дискусија во правната сфера.

Шефот на мисијата на ОБСЕ во Скопје, Хозе-Луис Хереро, истакна дека кога дошол во Македонија неговите претходни колеги му пренеле многу песимистичка ситуација, при што рече дека не може да се согласи со нив. „Компаративно мислам дека државата и не е толку лоша. Основите се веќе поставени, а дури и повеќе од тоа, што значи институциите, правната рамка и луѓето. Потребно е подобрување, но сите се тука, сите постојат најмногу и соодветно“, рече амбасадорот на ОБСЕ во Скопје.

Народниот правобранител, Иџет Мемети, зборувајќи за обврските што ги има неговата институција, потсети дека освен што ги штити правата на граѓаните, исто така, и' помага и на администрацијата, односно го намалува јазот меѓу нив. (П.Р.)