Кавгаџиите од ВМРО-ДПМНЕ добија сдсмовска конкуренција

„Опозицијата да не наседнува и да не до��воли повторно да се фрла целата вина врз парламентот“, советуваат поранешни пратеници

Александра М. Митевска



Да се случуваше оваа расправа за распуштање на парламентот пред две и пол години, премиерот Никола Груевски ќе имаше поцврсти аргументи за прифаќање на иницијативата за предвремени избори. И вакви коментари може да се слушнат меѓу упатените откако завчера заврши нерешено првиот дел од дебатата во која пратениците се натпреваруваа кој поголема навреда ќе му каже на колегата од другата редица. Да не беше напишан извештајот на ЕК за годинава, пак, во него можеби ќе се најдеше уште една неповолна констатација за парламентот, покрај веќе напишаните, како на пример, за „напнатата политичка клима“ или за „потребата за зголемување на довербата меѓу политичките учесници“.

Законодавниот дом по втор пат во изминатите три години расправа за самораспуштање, со таа разлика што во 2008 година за владејачката ВМРО-ДПМНЕ беше прифатлива идејата за предвремени избори, при што партискиот лидер Груевски се повика на нефункционалност на парламентот и на отсуство на дијалог меѓу парламентарните партии. Но, овој пат, иако повторно летаат искри меѓу пратениците од спротивставените табори, на власта не и' е до избори. Сепак, и без тоа, Собранието од поодамна е претворено во предизборна арена. Или, како што вели поранешниот прв парламентарец и долгогодишен пратеник, Никола Поповски, како што наближуваат изборите, така и ќе паѓа се' пониско нивото на дебатата во парламентот. Така било секогаш. Затоа, додава тој, и се препорачува парламентот да не заседава откако ќе се распишат изборите. Но, сега се' уште е многу рано за тоа.

„Пратениците од ВМРО-ДПМНЕ отсекогаш настапувале прилично кавгаџиски, со реторика под потребното ниво. Но, во последно време очигледно е дека и социјалдемократите се адаптираат на тој стил. Притоа не верувам дека таквите настапи произлегуваат од самата пратеничка група, туку мислам дека се диктирани од ’Бихаќска’“, вели Поповски.

Еден поранешен пратеник, пак, посочува дека овој парламент е специфичен по тоа што дебатата во него, главно, ја водат „аутсајдери“, односно личности без посериозен политички багаж, така што поквалитетните парламентарци не можат да дојдат до израз. Освен тоа, евидентна е тенденцијата на пратениците да им се додворат на партиските врхушки што не се во парламентот за да би можеле да се изборат за уште еден мандат.

Поранешниот потпретседател на парламентот, Слободан Најдовски, кој повеќе години помина во пратеничките клупи, пак, посочува дека и ироничниот однос на спикерот Трајко Вељаноски кон опозицијата неретко е причина за спуштање на нивото на дијалогот меѓу пратениците. Сепак, вели Најдовски, законодавниот дом мора да си го зачува дигнитетот и не смее да дозволи повторно да биде посочуван како главен генератор на проблемите во државата, бидејќи е јасно дека проблемите произлегуваат од Владата. „На ВМРО-ДПМНЕ и на Груевски можеби им одговара очите да бидат вперени во парламентот за да се оттргне вниманието од потезите на Владата. Но, опозицијата не смее да наседнува на такви местенки и да дозволи повторно сета вина да се фрла врз Собранието, како што направи Груевски во 2008 кога реши да оди на избори“, објаснува Најдовски.