Два скопски центри за дијализа под концесија

Два скопски центри за дијализа, Министерството за здравство планира да ги даде под концесија на 15 години. Тендерот за концесионерство треба да биде распишан за околу шест месеци, а концесионерите треба да бидат назначени во втората половина на идната година. Министерот за здравство Бујар Османи вчера најави дека моделот на јавно приватно партнерство ќе започне со центрите за дијализа во Чаир и во Аеродром. Тој не обелодени дали тоа е објектот на Клиниката за ортопедски болести, или популарно познатиот Мајчин дом, или во прашање се сосема два нови центри.

За да нема пропусти во моделот на јавно приватно партнерство чии пионерски чекори ќе бидат во овие два скопски центри, Министерството за здравство планира да ги ангажира стручњаците од Светска банка, кои веќе имаат искуство во концесионерството и давање консултантски услуги. „Тие ќе работат на дефинирање на критериумите за издавање на државните објекти под концесија, со што и полесно ќе може да се дојде до цената на една дијализа. Консултанските услуги ќе бидат бесплатни“, рече министерот Османи. А договор за советодавни услуги пред околу еден месец Министерството за здравство склучи со Меѓународната финансиска корпорација (ИФЦ). ИФЦ на Министерството за здравство ќе му помогне во структурирањето и во спроведувањето на транспарентна тендерска постапка со цел анимирање на реномирани компании од земјата и од странство за нивно вклучување во проектот. Тендерската постапка ќе се спроведе со здружени средства од ИФЦ и Министерството.

Во Скопје веќе има еден центар за дијализа по принципот на јавно приватно партнерство. Тоа е центарот „Дијамед“ во општината Ѓорче Петров, каде што објектот и апаратите се на приватен инвеститор, а државата му плаќа на центарот за дијализата на пациентите. (Ј.Ј.)