Вицепремиерот Адеми дели лекции за албанскиот јазик

Вицепремиерот Абдулаким Адеми, кој на завчерашното доделување решенија за работа на 30 студенти ги покани сите медиуми, говореше само на албански јазик. Тој не најде за потребно да ги удостои македонските новинари и да им се обрати и на официјалниот македонски јазик, туку наместо тоа, им порача да го научат албанскиот јазик или да си носат со себе преведувач.

„Ова покажува дека медиумите на македонски јазик, односно новинарите, би требало да почнат да учат албански јазик. Доколку не учат, тогаш нека вработат по еден Албанец да им преведува“, рече Адеми. Вчера вицепремиерот Адеми не беше достапен да одговори која му била идејата за ваквиот настап. За вицепремиерот не претставуваше никаков проблем ниту тоа што не беше обезбеден превод на македонски јазик.

Експертите сметаат дека во настапот на Адеми нема никаква политичка порака, туку се користи прилика за добивање дневнополитички поени.Дали Адеми најавува дека во иднина и нема да говори на македонски јазик и со тоа ја повлекува линијата на федерална употреба на официјалниот јазик?

Од ДУИ велат дека ова, всушност, е негов одговор, кој е целосно во согласност со одредбите и придобивките од Рамковниот договор и не е во колизија со ниту една уставна или законска норма. „Постојано велиме дека познавањето на јазикот помага во градењето доверба и етничка кохезија затоа тоа мора да биде двострано. Таа посветеност време е да се покаже на дело од двете заедници“, одговараат од партијата на Али Ахмети.

Од Кабинетот на претседателот на Владата вчера изостана реакција, иако побаравме одговор на прашањето дали ќе реагираат на однесувањето на вицепремиерот.

Политикологот Владимир Божиновски оценува дека ова е само еден „излет“ на вицепремиерот Адеми, кој не очекува дека ќе се повтори во иднина. Главниот проблем, вели тој, е што партиите на Албанците се базираат на етнички концепт и никако не успеваат да се трансформираат во граѓански.

„Ова е само еден инцидент кој има дневнополитичка употреба и е за локална употреба, за кога ќе излезат на митинзи да имаат што да кажуваат пред гласачите. Но, ова е застарен модел и граѓаните повеќе ги интересира како економски да опстанат. Од друга страна, со ова непотребно се иритираат и македонските политички партии и дел од македонските граѓани. Со вакви ситни излети се обидуваат да се прикажат како омилени политичари со таа етничка компонента затоа што не знаат поинаку да се претстават“, истакнува Божиновски.

Тој додава дека иако не гледа никаква политичка порака, сепак, не смее да се пренебрегне фактот дека таквиот скандал се случува од висок функционер во Владата на Македонија. (Св.У.)