Во Гостивар се веат знамиња на непостоечки празник

Гостиварци се чудат на знамињата и не знаат што празнуваат

Киро Кипроски


ГОСТИВАР - Знамето на Република Македонија и знамето на албанската заедница, односно на Република Албанија, од завчера вечер се развиорени низ гостиварските улици. Истовремено се поставени и транспаренти на албански со слоганот "Паднатите за народот никогаш не умираат". Наредбата за поставување на знамињата ја издал гостиварскиот градоначалник, Руфи Османи.

На гостивараци не им е јасно зошто има знамиња и прашуваа кој празник треба да го празнуваат. "Деветти јули е ден за почит на трагично загинатите од бруталната и незаконската интервенција на државата врз своите граѓани. Овој ден секогаш ќе биде одбележан како општински ден и затоа секогаш ќе се поставуваат знамиња во почит на загинатите", изјави за "Утрински весник", Руфи Османи. И неговите претходници на челното место во локалната самоуправа го одбележуваа овој ден, но не на ваков начин.

Инаку, на 9 јули 1997 година, два часа по полноќ, спроведувајќи судска одлука, од јарболите пред опшгтинската зграда во Гостивар полицијата ги симна незаконски поставените знамиња на Република Албанија и на Република Турција. По ова, Албанците од градот и селата, организирано протестираа, а имаше истрели од оружја. Имаше директен судир со полицијата. Немирите траеја речиси цел ден, при што од залутани куршуми загинаа тројца Албанци.

Гостиварскиот градоначалник и пред 13 години беше на првата општинска функција. Руфи Османи, за непочитување и неспроведување на одлуката на Уставниот суд - да ги симне знамињата на туѓи држави, беше осуден на неколкугодишен затвор, а по две години беше амнестиран.

Од СВР Тетово побаравме одговор дали че поднесат пријави за ова незаконско поставување знамиња низ Гостивар. Во одговорот стои дека Зконот за употреба на знамињата и Законот за празници, се изготвени од Министерството за правда, кое е надлежно за нивно спроведување во практика. Со тоа, Министерството за внатрешни работи не е надлежно да ги толкува и да постапува по законите. Но, во Министерството за правда мислат поинаку.

Портпаролката Мирјана Илиева изјави дека Министерството за правда ги носи законите, но не ги спроведува. "И овој закон МВР е должно да го спроведува и да поднесува прекршочни и други пријави. Министерството за правда нема инструменти за спроведување на законите", објасни Илиева.

Градоначалникот Руфи Османи со неговите привраници ги посети гробовите на трите жртви од немилите настани од 9 јули 1997 година и два гроба на лица кои загинаа во конфликтната 2001. Си��оќа требаше да се одржи академија посветена на загинатите од деветојулските настани на кои меѓудругите се поканети и амбасадорите во нашата држава од Албанија и Косово.