Прилеп се подготвува за „Пиво фест“

ПРИЛЕП - Од 15 до 18 јули во Прилеп ќе се одржи осмиот „Пиво фестивал“. На 30 локации, или на повеќе од 4.000 квадрати, ќе има штандови со пиво и скара, што е двојно повеќе од лани. Годинава, покрај на булеварот, ќе ги има и на плоштадот „Методија Андонов - Ченто“, како и кај Домот на културата „Марко Цепенков“. Посетителите ќе дегустираат 18 различни видови пиво, а ќе се мезат со прилепска и лесковачка скара.

В среда целиот сообраќај во центарот на Прилеп ќе биде пренасочен.

Се очекуваат близу 300.000 посетители од земјава и од странство. Сите сместувачки капацитети ќе бидат ставени на располагање, а најавата е дека голем број ќе бидат сместени и во Крушево.

„Наредниот викенд Прилеп ќе биде туристичка мека. Има што да понуди. Културни знаменитости и многу забава за време на фестивалот“, уверен е прилепскиот градоначалник Марјан Ристески.

Тој најавува специјални линии на железницата од Скопје за Прилеп за време на фестивалот, паркинзи на влезовите во градот и кампинг-простор за шатори во Паркот на револуцијата за сите кои нема да најдат сместување.

На свеченото отворање на фестивалот в четврток ќе настапат пејачите Елена Ристеска, Ламбе Алабаковски, Влатко Лозановски, Даниела Враниќ, Жаре Бербер и групата „Суперхикс“. В петок се предвидени Сузана Спасовска, Слаткар и групата „Ареа“. За доброто расположение в сабота ќе се погрижат Есма Реџепова, Влатко Илиевски, оркестарот „Гуча“, „Трета димензија“, а в недела посетителите ќе имаат можност да го проследат 90-минутниот настап на српската и балканска фолк-ѕвезда Светлана Ражњатовиќ - Цеца. Од локалната самоуправа не сакаат да откријат детали за тоа колку ќе чини ангажманот на гостите и музичките ѕвезди на фестивалот, оти тоа, велат, е работа на пиварниците кои се спонзори.

Минатата година на „Пиво фест“ имало околу 200.000 гости, се испиле 110 тони пиво и се изеле 60 тони скара. (МИА)