Црвенковски: Око не ми трепнува за „Надеж“

Експретседателот Бранко Црвенковски вели дека воопшто не е загрижен за случајот „Надеж“, бидејќи, според него, одлуката за ангажирање на словенечките експерти е законски чиста.

„Не ми паѓа на памет моите односи, релации, разговори, било со премиерот Борут Пахор, било со претседателот Данило Тирк, или со кој било друг политичар од Словенија или од друга земја, да дозволам да станат дел од оваа македонска машина за валкање имиња. Воопшто не е важно кој ми ги препорачал словенечките експерти, дури не е ни важно кој формално го потпишал договорот за нивниот ангажман. Одлуката ја донесов јас и зад неа стојам. Таа одлука законски е чиста и од тој аспект око не ми трепнува за сето ова што се случува. Бидејќи Антикорупциска комисија веќе ја заврши својата задача што и' беше доделена, не сите, меѓутоа претседателот и неколку членови. Уште еднаш ја користам оваа прилика да упатам порака до Обвинителството и од судството: не влегувајте во политички сценарија, не подлегнувајте на притисоци, погледајте го Законот и постапувајте според него. Тоа е единствен начин да не згрешите и да не понесете одговорност“, порача Црвенковски.

На ваквиот настап на лидерот на СДСМ вчера возврати ВМРО-ДПМНЕ, обвинувајќи го дека со аферата „Надеж“ предизвикува меѓународен скандал и го урива угледот на државата. „За што не ви трепнува око, господине Црвенковски? За 340.000 евра непотребно и незаконски потрошени пари на граѓаните. Се однесувате како да станува збор за 34 денари, а не за 340.000 евра“, рече пратеникот од ВМРО-ДПМНЕ Александар Николоски на вчерашниот прес. (П.Р.)