Од ОН уверувале дека ќе се коригираат за јазикот

„Во врска со случајот во ОН, преземени се сите дипломатски активности за корекција на грчката саботажа во именикот на ОН. Добиени се уверувања од кабинетот на генералниот секретар, Бан Ки Мун, дека ќе следува корекција и повторно впишување на македонскиот јазик во личната карта на Македонија како земја-членка. Нема да им успее на грчките дипломати да го избришат македонскиот народ и јазик - само ќе направат за нас повеќе да се дознае и во ОН“, се вели во реакцијата на Министерството за надворешни работи.

Членот на дипломатскиот совет на СДСМ, Љубомир Фрчкоски, пак ја обвини Владата на ВМРО-ДПМНЕ дека ја загубила битката за националниот идентитет и за јазикот. „Во текот на мандатот на сите влади досега во независна Македонија, од Кљусев до Бучковски преку Георгиевски и откако Македонија е во членство на меѓународните организации, таа го имаше правото да го користи атрибутот ’македонски’ за својот јазик и за својот народ. Но, оваа Влада на ВМРО-ДПМНЕ го загрози тоа. Слабата и празна реторика на оваа Влада, првпат во историјата на независна Македонија, директно ги загрозува нашите идентитетски позиции во странство и меѓународните организации. На тој начин поради нејзината непостојна политика за одбрана на националните интереси, директно им помага на нашите противници“, рече Фрчкоски.

Тој тврди дека има начин да се реши спорот со името, кој е единствена блокада кон евроатланските организации. „Основата за решението е следна: проблемот може да се реши без допирање на националниот идентитет и без промена на македонскиот Устав. Тоа е возможно, тоа е основата за решение. Тоа е доволно добро“, изјави Фрчкоски. (П.Р.)