Претходен број

Битолски и прилепски камионџии малтретирани и тепани во Грција

Ознаката ФИРОМ на документацијата го куртули од ќотек 46-годишниот битолски камионџија Ѓорѓи Ѓ.

СМК Грција да престане да ги нарушува добрососедските односи Светскиот македонски конгрес бара Грција „да се одлепи од фашизмот и антимакедонизмот и да ги прекине мерките на економска блокада и насилствата врз македонските граѓани и добра во Грција, бидејќи тоа не придонесува за добрососедските односи, стабилноста и безбедноста во регионот и зајакнувањето на довербата меѓу македонскиот и грчкиот народ. Елинизмот мора да ја прифати реалноста оти Македонија е држава, дека постојат и македонскиот јазик, и македонската култура, и Македонската православна црква, и македонскиот народ како посебен етнос од грчкиот“, се истакнува во вчерашното соопштение СМК. (П.Р.)

БИТОЛА - Ознаката ФИРОМ на документацијата го куртули од ќотек 46-годишниот битолски камионџија Ѓорѓи Ѓ., кој вчера на патот од Атина кон Лариса бил малтретиран од толпа грчки камионџии. Тие од него побарале да ја симне меѓународната ознака МК.

Битолскиот камионџија тврди дека на автопатот за Сервија прилепски возач на камион бил претепан од грчките националисти и завршил во болница. Македонската Влада нема начин како да ги заштити своите граѓани што патуваат кон југ. Владата на Македонија уште еднаш апелираше до грчките власти да им обезбедат сигурен престој на странските државјани кои патуваат во нивната држава.

Битолскиот камионџија Ѓорѓи Ѓ. вчера со мал камион за пренос на текстил, враќајќи се од Атина кон Лариса, кај надвозникот за Кожани паднал во мрежата на 150 грчки демонстранти кои ги запирале само товарните возила со македонска ознака. Од него ги побарале на увид сите документи што ги носи со себе и со закани го натерале да ја извади етикетата МК. Неколкумина од нив, под дејство на алкохол, го заплашувале Ѓорѓи со ќотек и го исмејувале. Малтретирањето траело околу половина час.

„Речиси педесетина Грци ми го обиколија камионот, со закани побараа да излезам од возилото и сам да ја избришам ознаката МК. Меѓутоа, етикетата е нова, пластична и не можев да ја симнам. Тие се обидоа со нож да ја отстранат, а откако не успееја, се откажаа од намерата и ја оставија. Потоа во документите за стоката го бараа зборот Македонија, но таму пишуваше ФИРОМ. Меѓу нив имаше неколкумина пијани што сакаа физички да се пресметаат со мене. Постар Грк им објасни дека нигде не стои зборот Македонија. Така ме пуштија да продолжам“, раскажува битолскиот камионџија.

Но, како што тврди, на стотина километри подалеку, кај градот Сервија, наишол на уште една група демонстранти кои побарале од него да го паркира камионот до возило со прилепски регистарски таблички чиј возач бил брутално претепан.

„Не успеав да ги запомнам бројките од регистрацијата. Но, Грците ми се пофалија дека прилепчанецот кој одбил да го запре камионот на нивниот знак добро го истепале, по што завршил во болница“, се потсетува Ѓорѓи.

Битолчанецот случајот веднаш го пријавил кај Граничната полиција на преминот Меџитлија. Уплашен и загрижен за својата безбедност, камионџијата вели дека веќе нема да патува за Грција.

Министерот за надворешни работи, Антонио Милошоски, прашан дали Владата има начин како да ги заштити своите граѓани кои патуваат за Грција, вели дека грчките власти се тие кои треба итно да преземат мерки и да им обезбедат сигурно патување на странските државјани.

„Во овој момент треба да се пристапи со ладни глави. Апелираме до грчките власти за доброто на граѓаните да преземат мерки за владеење на правото. Тоа е минимумот што треба да го направи Грција“, нагласи Милошоски. (Б.А.)