Претходен број

Поглед

Баксузни инкасатори

Инкасаторите на патарините во земјава дефинитивно ги следи баксуз година. Едвај куртулија од прикриените агенти кои со Џемс Бонд камери ги изнасликаа додека за ситни пари пропуштаат возила на граница, кога ги сардисаа нови опасности – закани за шлаканици од младите и полетни партиски кадри.

Додека поголема група инкасанти се наоѓаат на обвинителна клупа каде што им се суди за злоупотреби, останатите нивни колеги се разбегаа на годишни одмори додека не заврши изборната кампања. Првите настрадаа затоа што ги кревале наплатните рампи за добар надомест. Вторите, пак, ќе си го окркаа затоа што не сакале да ги кренат рампите за партиските активисти на ВМРО-ДПМНЕ и на ДПА кои брзаа на митинзи.

Полицијата во првиот случај реагираше експресно и им стави лисици на рацете на голем број вработени на патарините кои дел од наплатата ја ставале во сопствениот џеб. Во вториов случај, на партиските симпатизери и членови кои ги нападнале наплатните рампи кај Тетово, Желино и Гостивар не им фали ниту влакно од главата. А тие не само што го оштетија државниот буџет со тоа што јавно пред камерите со стотици автомобили крстосуваа по западната магистрала без ниту еден денар надомест, туку и направија дополнителна штета со кршење на наплатните рампи.

Дали имало партиски наредби за кревање на рампите или некој сам решил да се ослободи од плаќање, ќе треба да утврди полицијата. Од МВР, инкасаторите очекуваат да им обезбеди без страв и трепет да ја извршуваат наплатата, а граѓаните се надеваат дека законот ќе се спроведува и за време на изборната треска.