Претходен број

ЕДИТОРИЈАЛ

На магарешка клупа во Советот на Европа

Тамара Грнчароска

Може да станеме првата земја во историјата на Парламентарното собрание на Советот на Европа (ПССЕ) која од постмониторинг-фаза може повторно да биде вратена на мониторинг од страна на Советот.

Ова пред два дена ни го порача ад-хок постизборната комисија на ПССЕ, која два дена слушаше објаснувања и ставови од сите релевантни политички чинители во земјава за политичката состојба по изборите, работата на парламентот, меѓуетничкиот и, пред се', меѓупартискиот дијалог, и донесе заклучок: „Ќе ја разгледаме можноста за отворање постизборен мониторинг, односно на механизам на постизборен мониторинг, што значи дека се идентификувани одредени проблеми, поточно одреден дефицит во однос на демократијата, владеењето на правото и човековите права, кои се основните вредности врз кои се темели Советот на Европа“.

По се' изгледа, двата члена на мисијата на Советот на Европа не биле фасцинирани од средбите и приложеното на нив онолку колку што беа импресионирани македонските политичари кои со „позитивни впечатоци и чувства“ излегуваа од средбите со Мевлут Чавушоглу и Андреас Грос. Ад хок комисијата на ПССЕ, пак, дипломатски ни најави да се поправиме или да се подготвиме да влеземе во европската историја како негативен пример на повторувач. „Се' уште сме во фаза на анализирање и ќе ја разгледаме оваа можност која можеби ќе биде предложена на Бирото на Парламентарното собрание во септември“, беше ставот на Чавушоглу.

На двочлената комисија испратена во земјава за да ја скенира состојбата во земјава по „проблематичните избори“ и како се спроведуваат препораките кои тогаш ни беа дадени, една од забелешките се однесува на работењето на Собранието з�� кое тие ќе предложат Советот на Европа да му помогне да го смени својот деловник.

Сепак, една од главните забелешки на Чавушоглу и Грос била на сметка на политичкиот дијалог, особено бојкотот на парламентот, кое станува вообичаена пракса на опозиционите партии, пред се од албанскиот блок. По неколкумесечниот бојкот од страна на ДУИ во претходниот собраниски состав, најавениот нов бојкот, од страна на сега опозициската ДПА, не ги одушеви претставниците на Советот на Европа, кои тоа го оценија како не зрело однесување. „Им порачуваме да го сопрат бојкотот, бидејќи нив ги избрале граѓаните и тие ним им должат да бидат во Собранието“, беше пораката од претставниците на ПССЕ.

Ако на таквата состојба се додаде и однесувањето на лидерот на ДПА, Мендух Тачи, кој во интерес својата партија и суета, а не на Македонија, одби да се сретне со претставниците на ПССЕ кои го цртаат профилот на земјава за надвор, станува повеќе од јасно каква слика за демократија и демократско однесување, пред се политичка култура, испраќаме од дома. И Али Ахмети не помогна многу во таа насока. Тој иако беше поконструктивен за соработка со ПССЕ, од позиција на власт, за меѓупартискиот дијалог остана затворен во сопствениот партиски свет. На прашањето дали би се сретнал со Тачи тој само кратко одговори: „Ќе покаже времето“.

Партиските и политичките лидери во земјава никако да сфатат дека времето, иако е релативна категорија, на Македонија во поглед на Европа и европските стандарди, се повеќе конкретно и недостига.

Несигурното „можеби“ од страна на Чавушоглу и Грос за предлогот за обновување на мониторингот врз нашата земја, две и пол години откако беше укинат, ни е единствената надеж дека имаме уште малку време да се поправиме и да ја избегнеме магарешката клупа за повторувачите, од која ќе треба да го избришеме правот за да седнеме.