Претходен број

Судот се сомнева дека новинарот Танески е убиен!

Обвинителството бара дополнителна истрага поради сомневање од траги на насилство на телото

Гојко Ефтоски

ТЕТОВО – Постојат индиции дека новинарот Владо Танески не си го одзел сам животот во притворското одделение на тетовскиот затвор, туку е можно да станува збор за убиство, во кое учествувале непознати сторители. Ова се последните сознанија добиени од тетовскиот суд, каде што во тек е истражната постапка за случајот со смртта на кичевскиот новинар Владо Танески, кој полицијата го приведе поради сомневање дека извршил неколку убиства на жени во Кичево.

Како што дознаваме, Јавното обвинителство во Тетово бара преземање дополнителни истражни дејства за случајот со смртта на новинарот Владо Танески. Барањето било преземено по добиените сознанија од обдукциониот протокол, според кој во тетовското Обвинителство дошле до заклучок дека имало показатели во вид на повреди на телото на Танески, кои евентуално биле нанесени од други лица.

Оттаму и основаноста за истражни дејства против непознати сторители за сторено кривично дело убиство, кое произлегува од член 123 од Кривичниот законик на Македонија. Со новото вештачење по барање на обвинителот ќе се утврдува правецот за натамошно насочување на новите дејства. Одредени сомневања за смртта на Танески се појавија и за време на обдукцијата во Скопје, каде што на Институтот за судска медицина беа утврдени модринки на телото на новинарот, кои форензичарите не можеа да утврдат како настанале и дали можеби му биле нанесени откако бил пронајден во кофата со вода, кога му била давана брза помош.

Нејаснотии останаа и околу содржината на кофата со вода, во која беше пронајден удавен новинарот. Иако се претпоставуваше дека е можно во неа да имало токсични материи, од полицијата информираа дека водата е чиста.
Во постапката која веќе е во тек, истражниот судија при Основниот суд во Тетово ќе ги преиспитува и ќе ја насочи потрагата кон нови сознанија. Јавното обвинителство се' уште го нема добиено комплетното графолошко вештачење, особено за автентичноста на ракописот на прошталното писмо испишано на задната страница од решението за притвор на новинарот Владо Танески. Во писмото кое било пронајдено под неговиот душек, на креветот каде што отспа само една вечер, тој тврдел дека не ги извршил убиствата на жените и дека е горд на своето семејство. Неговата сопруга Виолета во неколку наврати за медиумите тврдеше дека никогаш не го видела и не и' било покажано писмото, со цел да посведочи дали станува збор за ракописот на Танески.

Кичевскиот новинар беше пронајден мртов на 23 јуни околу 2 часот по полноќ во една од ќелиите на Општинскиот затвор во Тетово, каде што само 30 часа пред тоа од истражен судија на Основниот суд во Гостивар бил упатен во притвор. Беше осомничен како сериски убиец на неколку жени во кичевскиот крај.