Јован Вангеловски - нов претседател на Врховниот суд
За скопскиот адвокат гласале сите 11 члена на Судскиот совет
Гордана Дувњак
Македонското судство од вчера доби нов човек. За претседател на Врховниот суд едногласно е избран поранешниот скопски адвокат Јован Вангеловски, кој по функција станува и претседател на Судскиот буџетски совет, како и член на Судскиот совет и на Управниот одбор на Академијата за обука на судии и обвинители. Неговиот избор беше примен без големо изненадување во судските кругови, бидејќи тој и досега важеше за фаворит во трката за највисоката судска функција поради кумовската врска со актуелниот претседател на Собранието Трајко Вељановски.
Вангеловски беше избран во експресна постапка, бидејќи за помалку од еден час тој беше изгласан и веднаш повикан да даде свечена изјава. Наследникот на Илиев е избран меѓу двајца кандидати, а за него гласале сите 11 присутни члена. Судскиот совет во моментот на изборот броеше 13 члена ( поради оставката на Љубен Алексиевски и изминатиот мандат на досегашниот претседател на Дане Илиев), а на седница не присуствуваа членовите Васил Грчев и Бојан Ефтимовски.
Коментирајќи го изборот, претседателот на Судскиот совет Беќир Исени потенцираше дека и двајцата кандидати биле добри, но гласале за оној што мислеле дека е подобар.
„Натежнаа квалитетите на Вангеловски, кој е врвен адвокат и правник, иако и другиот кандидат, врховниот судија Никола Николовски, е одличен и може слободно да биде претседател“, додаде Исени. Тој рече дека ја анализирале работата на двајцата кандидати и ги разгледале нивните програми за работа.
На прашањето дали изборот е направен по партиска препорака, Исени иронично кажа дека „ако ги сметате сите членови дека имаат некаква пар��иска определба, тогаш може и така да се каже“.
Исеини потврди дека иако Вангеловски има искуство на врховен судија од само еден месец, тој и порано работел како судија во Стопански суд. Тој вели дека не знае оти Вангеловски е познат во јавноста како адвокат кој ги бранел вмровските кадри.
Брзањето со изборот тој го објасни со итноста на состојбите во судството. „Дојдовме во ситуација многу работи да не се извршуваат. Немаше кој да го брани судството при ребалансот на Буџетот, бидејќи тоа е работа на претседателот на Судски буџетски совет, кој не само што не свика седница на Судскиот буџетски совет, туку не одреди и заменик“, појасни Исени.
Во првата изјава за медиумите, новоизбраниот претседател на Врховниот суд рече дека бил пријатно изненаден од изборот. Тој вели дека е свесен за одговорноста на функцијата, бидејќи доаѓа во клучен период за реформите во судската власт. Се надева дека функцијата ќе ја врши успешно и во целост ќе го спроведе она што го навел во програмата.
Новиот претседател на највисокиот суд не мисли дека македонското судството е исполитизирано. „Судството е независно, така е поставено според Уставот и ќе се уверите дека така ќе биде“.
Вангеловски не очекува партиски притисоци, а за релациите со Вељановски додава: „Ако некој е со некого во кумовски врски, тоа е негова приватна работа. На сите ви е познато дека претседателот на Собранието не учествува ниту во изборот на судиите, ниту на претседателите на судовите“. Коментарот, пак, на Исени беше дека членовите на Судскиот совет не се членови на Трајко Вељановски. Но, тој имаше потреба да појасни дека и покрај тоа што приватно бил поблизок со Николовски, сепак, гласал за Вангеловски.
На крајот, Исени информираше дека во Судскиот совет тече постапка за избор на нов член на Судскиот совет. Според законските рокови, изборот треба да заврши меѓу 5 и 6 септември, а најдоцна до почетокот на септември ќе се пополни и последното испразнето место во Врховниот суд, како и останатите места во другите судови. |
