МОБ со подобрени услови за работа

Македонската опера и балет во изминатите две години има подобрени услови за работа на вработените, што резултира со повисок квалитет на претставите и со зголемена посетеност.

Министерката за култура, Елизабета Канческа - Милевска, вчера ја посети институцијата во која во 2007, 2008 и 2009 година беа инвестирани 72 милиона денари. Таа информираше дека со парите е обновена фасадата на објектот, целосно е променета сценската технологија што овозможи балетските претстави да се изведуваат со истовремен настап на Оркестарот на МОБ, а не на снимена музика како пред тоа. Целосно е санирана и покривната конструкција и нема протекувања, реновирани се главниот влез, фоајето, санитарните јазли, билетарницата, пристапот до паркингот, а првпат по 30 години откако објектот е во функција целосно се обновени и 55 работни простории за музичарите, балетските играчи и за вработените во администрацијата. Покрај инвестирањето во инфраструктурата, зголемени се и платите, а 150 ангажирани со договори станаа редовно вработени.

„Имаме значајно зголемување на платите и мега вработувања, како што немаше во изминатите 25 години откако сум јас во оваа куќа“, рече Оливер Арсовски, директор на МОБ.

Тој соопшти дека покрај средствата од Владата и од Министерството за култура кои се главни инвеститори во обновата на МОБ вложиле и 10 милиони денари сопствени средства, но има и донации. Куќата е во преговори со донација наскоро да ги замени столчињата и паркетот во салонот.

„Уметниците се среќни што работат во подобрени услови. Тоа ја зголеми значително и посетеноста и гледалиштето на претставите е до 80 отсто исполнето. Добрите услови носат и добри гости и звучни уметнички имиња, особено на „Мајските оперски вечери“, рече Арсовски. (Н.П.)