Мис на светот

Американката Александрија Милс - најубава за 2010

Од 30 октомври започна годината на убавината за Американката Александрија Милс. Оваа 18-годишна девојка е прогласена за мис на светот на изборот што се одржа во во кинескиот град Санји, Кина, во саботата на 30 октомври. За прва придружничка е прогласена мисот на Боцвана, Ема Вареус, додека мисот на Венецуела, Адријана Васини, е прогласена за втора придружничка.

Новопечената мис на светот неодамна матурирала и сака да стане учителка или фотограф на пејзажи. Не знае ниту еден друг јазик освен англиски, а обожава патувања, музика и свирење на француски рог и ударалки. Пораснала слушајќи кантри и класичен рок, па тоа и' е омилениот вид музика. Себеси се опишува како позитивна, спонтана личност, на која никој на светов не и' е туѓ. Сака тестенини и италијанска кујна, а истакнува дека е вегетаријанка. Чува кучиња - бостонски териер и слепа пудлица, која има 13 години.

Меѓу 115 убавици што се бореа за круната, беше и македонската претставничка Стефани Борсова, која не се ни приближи до топ 25.

Во топ 7 влегоа мисиците на Ирска, Венецуела, Кина, Италија, Норвешка, САД и на Боцвана. Иако на обложувалниците важеше за фаворитка, мисот на Норвешка не мина во последниот круг на изборот. Меѓу топ 5 се најдоа претставничките на Венецуела, Боцвана, САД, Ирска и на Кина.