Претходен број

Слабата опозиција овозможува апсолутна власт

Бранко Црвенковски на трибината „Македонија, предизвици и перспективи“

Сериозен проблем е постојаното промовирање популизам во водењето на државните работи

Симон Илиевски

ОХРИД – „Опозицијата и пред парламентарните избори беше слаба, а сега е уште послаба, што создава услови за апсолутна власт на позицијата“, предупреди во саботата навечер од Охрид претседателот Бранко Црвенковски од трибината „Македонија, предизвици и перспективи“. Сериозен проблем, според Црвенковски, е постојаното промовирање популизам во водењето на државните работи. „Сега, доколку некој нешто рече дека е нерационално, ќе биде обвинет дека е против државните интереси“. Според претседателот Црвенковски, не станува збор за изолирани случаи, туку за популизам што го има во сите сфери на државата. Ваквата оцена тој ја илустрира со примерите на отворање нови факултети и универзитети, патриотските фискални каси, компјутеризација на училиштата и изградба на црква на плоштадот во Скопје.

„Сериозно сакам да предупредам на воведувањето популизам во водењето на државните работи. Убеден сум дека нема политичар кој одвреме-навреме не ќе направи некој популистички потег и одлука за да му се додвори на народот и кај гласачите. Она што загрижува во нашиот случај е тоа што не се работи за издвоени примери, туку за систем што се установува во водењето на државата и имплементирањето на државните политики. Тоа е цел сама за себе, а не средство за да се постигне нешто за државата“, рече Црвенковски.

„Без силна опозиција нема да има одговорна власт“, смета Црвенковски. Во ова постизборие победниците сакаат да се престројат на победничката страна, па дури и оние што не гласале за коалицијата на ВМРО-ДПМНЕ, за жал, им се приклучуваат на интелектуалците и на други важни општествени групи.

Претседателот Црвенковски на трибината во Охрид рече дека ја презема моралната и секоја друга одговорност јавно да проговори за алармантноста за некои актуелни состојби за кои другите молчат. За него опасна е ситуацијата во која за се' што ќе направи власта треба да се аплаудира или во спротивно да се молчи зошто лесно човек може да биде етикетиран дека е против националните и државните интереси на Македонија. За жал, како што рече Црвенковски, од тоа се плашат интелектуалците и други важни структури што се надвор од власта.

„Новата влада ја сочинува коалицијата на ВМРО-ДПМНЕ и ДУИ, што е сосема политички логично и нешто што се претпоставуваше, но со право се поставува прашањето зошто се изгубија две години и се пласираа приказни дека ВМРО-ДПМНЕ, како што велеа, нема да коалицира со терористи“.

Анализирајќи ја улогата на привремените избори, Црвенковски смета дека партиите немале ништо да изгубат доколку изборите беа во октомври. Зашто за државата беше многу битно да се искористи можноста за решавање на прашањето со името со Грците и влезот во НАТО. „Грција сега купува време до изборите во САД. Таа шанса им ја дозволивме“, смета Црвенковски. Тој објасни дека и натаму ќе стоиме на ставот да не се менува името Македонија и по ниедна основа да не се оспорува македонскиот народ, македонската нација, јазикот и културата.

На трибината во Охрид присутните го прашаа Црвенковски за состојбата во СДСМ како најголема опозициона партија. Тој изрази уверување дека поразот не е само поради агресивната кампања на ВМРО-ДПМНЕ, туку дека СДСМ направи многу грешки кои и него го збуни. На завчерашниот брифинг со охридските новинари на прашањето дали ќе се врати во СДСМ и дали ќе се кандидира на идните претседателски избори, Црвенковски рече дека нема став и дека се' уште има време за процени.

Вчера, владиниот портпарол Ивица Боцевски одби да ги коментира пораките од трибината во Охрид. „Владата не сака да се пушта во партиски дискусии и во коментирање партиски трибини каде што отсуствува реална продуктивна дебата и доза на самокритичност“, изјави Боцевски.