Претходен број

ДУИ останува на барањето албанскиот да биде службен јазик

Во владината програма за јазикот нема ниту збор. Освен една реченица дека ќе се спроведе Рамковниот документ

Оливера Војновска

Демократската унија за интеграции останува на своите барања за издигнување на албанскиот како службен јазик во Македонија, решавање на статусот на борците на поранешната ОНА, како и корекции на Законот за полиција. Наспроти ваквиот став на ДУИ, во владината програма за ова нема нема ниту збор. Освен една реченица дека ќе доврши имплементацијата на Рамковниот документ. Сепак, ДУИ смета дека новата влада ќе биде влада на стабилност, а ВМРО-ДПМНЕ е уверена дека ќе има капацитет да ги реализира зацртаните програмски приоритети. Опозиската СДСМ, пак, вчера немаше никаков коментар ниту за програмата што ја достави мандатарот Никола Груевски изминатиот викенд во Собранието, ниту за составот на Владата.

Портпаролката на ДУИ, пратеничката Ермира Мехмети, вчера во парламентот изјави дека новата влада на ВМРО-ДПМНЕ и на ДУИ ќе биде влада на стабилност, ќе ужива двоен легитимитет и ќе претставува одраз на победата на најголемите партии во двата најголеми етнички блока. „Влада која има легитимитет е влада која има капацитет да ги спроведе сите тешки политички прашања и одлуки. Рамковниот договор во корен го измени политичкиот систем во Република Македонија. Тој процес трае, а за ДУИ е клучно тоа што на новата влада нема да и' недостига посветеност за спроведување на Охридскиот договор“, нагласи таа. Мехмети подвлече дека ДУИ и како опозиција активно преговарала со ВМРО-ДПМНЕ во обид за хармонизирање на ставовите за чувствителните прашања. „Преговорите продолжуваат, но сега во нов формат на владини партнери. И ние немаме сомнение дека ќе се изнајде решени�� кое ќе биде одраз на потребите на граѓаните. Нашите забелешки за Законот за полиција остануваат и ние и натаму ќе работиме за хармонизација на разликите и усогласување на ставовите за спроведување на законот“, рече таа. На новинарско прашање што не е завршено, односно имплементирано од Рамковниот договор и што договориле конкретно Груевски и Ахмети, Мехмети рече: „Постигнување целосна правична застапеност во јавната администрација, прашањето на употреба на јазиците како едно од клучните столбови на Рамковниот документ, довршување на процесот на децентарализацијата и изнаоѓање решение за жртвите од конфликтот во 2001 година“. Прашана дали ДУИ останува на барањето албанскиот да биде службен јазик во Македонија, Мехмети одговори: „И во Рамковниот договор постои рамка и се дава можност за службена употреба на албанскиот јазик. Тоа е сосема легитимно прашање и не се коси со одредбите. Имаме проект, предлог-решение како треба да биде уредена службената употреба на албанскиот, кој уште во јануари е доставено до ВМРО-ДПМНЕ. Врз основа на тој предлог, преговаравме десет месец и нашите партнери ги знаат нашите ставови за тоа како треба да биде решено прашањето за јазикот“.

Во врска со ваквите тврдења на Мехмети, директорот на центарот за комуникации на ВМРО-ДПМНЕ, пратеникот Илија Димовски, само кусо рече дека „Владата на Република Македонија ќе го има целокупниот капацитет да ги преземе обврските што стојат во владината програма“. Притоа, тој додаде дека ВМРО-ДПМНЕ јасно го кажала својот став за споменатите прашања пред десет дена кога се објави владината коалиција.

ВМРО-ДПМНЕ тогаш официјално соопшти дека ќе има мораториум на измените на Законот за полиција и на Законот за симболите, дека донесувањето закон за јазиците ќе биде во согласност со Уставот и Охридскиот договор, а прашањето на жртвите од конфликтот во 2001 година да се реши во рамки на постојните закони без носење нов закон.

За обвинувањата на ДПА, пак, дека новата влада нема да ги реализира албанските барања, Мехмети и' порача на партијата на Тачи да се занимава со себе и да ја напушти арогантната и агресивната политика. „ДПА никогаш не победила на избори, тоа е партија која влезе и излезе од Владата без никакво барање, па нема морално право да се залага за решение на кое било прашање што ги засега Албанците“, додаде таа.

ВМРО-ДПМНЕ ќе ја почитува одлуката на ДПА за бојкотирање на парламентот, а за ставот на партијата на Мендух Тачи дека „Владата ќе ја спроведува програмата на ВМРО-ДПМНЕ и дека нема да ги исполни албанските барања“, Димовски рече дека „тоа е нивно мислење“.