Контрапункт
Хунза-македонски односи
 Никола Гелевски
Решив неделава да баталам со политичките глупости и да му го отстапам просторот на славниот Пандалф Вулкански
Наоѓајќи целосно себеименување и себеисполнување во глетката на конечно пронајдените принцот и принцезата на моето повеќемилениумско племе, решив неделава да баталам со политичките глупости и да му го отстапам просторот на славниот Пандалф Вулкански. Дополнителна причина овде да се поместат делови од тајниот Речник на Вулкански е што токму во неговиот Речник се испитуваат врските меѓу Хунза јазикот и македонскиот. И не само јазичните врски туку и пошироко: релациите меѓу многуженецот и многубожецот, синхроно со релациите меѓу моногамистот и монотеистот. Впрочем, низ овие четири поврзани фрагменти, почитувани читатели, во тоа можете да се уверите:
ЧУВАРОТ ВОВЛЕ АРБИТРИРА ПРЕД ХУНЗА-МНОГУБОЖЕЦОТ И МАКЕДОНЕЦОТ-МНОГУЖЕНЕЦ
Чуварот Вовле (што на времето и'го вовлече на Ленче; в. Вовлечува) чувал еден мост, всушност мовче преку кое можело да помине само едно вовче, толку било тесно (затоа и бил поставен Вовле да чува, а не да вовлечува, иако Вовле во самотијата си повлекувал, без многу да вовлекува, по некој џоинт).
Еден ден на мовчето (под кое имало мов, патеписецот Вулкански се наведнувал да види:) се судриле, неочекувано, еден многуженец и еден многубожец!
„Ко судир меѓу прериски гну и шумски гном, господ да чува!“, си помислил Вовле, оти видел дека никој не сака да се истави од патот.
И почнале да се навредуваат многуженецот и многубожецот: „Мавни се од мовчево, многубожец, оти може да наиде вовчето...“, рекол многуженецот.
„Какво морално право имаш ти, многуженецу, од мене да бараш да се тргнам кога многукратно во животот си исконсумирал мноштво жени, ебате!“, рекол многубожецот.
„Твоите гревови, многубожецу, се неспоредливо помногубројни од моите... Мое мнение е дека ти попрво треба да се иставиш од мовчево“, рекол многуженецот.
„Потекнувам од многупати многунамачен народ, многуженецу! Ради тоа и станав многубожец! Нешто ко богомил, ако не си знаел...“, рекол многубожецот.
„Ја ко што знам“, рекол многуженецот, „вие многубошците имате многураки и многуглави богови, не?“
Во тој момент почнало да се приближува и вовчето! Затоа Вовле го фрлил џоинтот и фино ги замолил обајцата тврдоглави: „Многупочитувани, фасциниран од вашата многуликост, но пред се' од многуглаголивоста (која неумоливо ме наведува да помислам - може ради џоинтот, додуша - дека сте само многузначни ликови на славниот и многустран патепесец Вулкански:), еве пропафкав малку од зелениот, слушајќи, велам, и уживајќи... Но, време е да се тргаме од мовчево оти момчено во локомотивата нема респект кон многуженци и многубошци!
И тогаш конечно се тргнале од мостот, тројцата, за да помине вовчето, во кое бил Вулкански лично! Оттаму и приказнава...
НАСПРОТИ ТОА, МОНОГАМИСТОТ И МОНОТЕИСТОТ СЕ СКЕПТИЧНИ
За тоа време, седеле еден моногамист и еден монотеист и на монитор (а монотеистот и низ монокл, подобро да види) ја гледале контроверзната екранизирана приказна за судирот меѓу многубожецот и многуженецот (в.).
„Монотоно да умреш“, рекол моногамистот.
„Фали монолитност“, рекол монотеистот.
„Осеќам дека Вулкански и монографија ќе објави по повод настанот“, рекол моногамистот.
„Ко да има монопол на монолог, ебате проклетиот писател“, се нанервирал и монотеистот.
„Право да ти кажам, поинтересно ми е да гледам монокотиледони и монопетали, отколку идиотизмите на многуженецот и многубожецот“, рекол моногамистот.
„И моном да решаваш е поинтересно од моронот Вулкански!“, рекол монотеистот и решиле да го исклучат мониторот.
По повод, па, дополнителниов настан, има испечатено и монотипија (да не претеруваме со монографија!), потпишана со монограмот П. В. :)
МЕИНСТРИМ Е ДА СИ МОНСТРУМ
„Какво време дое, меинстрим е да си монструм!“, му рекол моногамистот на монотеистот.
„Атракција, монтажа, ништо друго... Потажно е денес да си моногамен отколку да си роб на плантажа!“, одговарил моногамистот.
„Можеби можеме и ние да пробаме?“, се прашал монотеистот.
„Дошол монтер и му го стерал на монструмот!“, почнал моногамистот.
„А монструмот возел мопед, оти бил и педофил, проклетиот!“, рекол монотеистот.
„Монтерот прво го срушил монструмот од мопед. И му рекол: Опс! Извини!, фрлајќи го во шепите на кучето мопс!“
„Ха ха ха!“, се насмеал монотеистот. „Ко мониста да редиш е работава, не е монотоно!“
„Комунист да не станеш, со својот монотеизам?!“, прашал моногамистот.
„Ха ха ха! А ти монах да не станеш!? Монарх на монтажата! Тоа сакам да бидам!“, рекол монотеистот.
ОД НИКАДЕ ПОЈАВЕНОТО МОМЕ ЗА МОМЕНТ ГО РАЗРЕШУВА СУДИРОТ
„Момент, доаѓа едно моме“, му рекол моногамистот на монотеистот.
„Мома, момиче или, не дај боже, момиченце? Кој доаѓа?“, прашал монотеистот.
„Од насока на Момин поток доаѓа доток на нешто ко моменце, да речеме“, рекол моногамистот.
„Ако е премногу млада дамла ме удира, ради тоа прашувам...“, се правдал монотеистот.
„Момирок штити од дамла. Уште ако и мома млада ти стави момирок на модрак (ил обична модринка), дамла избегнуеш гарант!“, рекол моногамистот.
„Под дамла подразбираш нешто ко анеуризма, мозочно мозолче што се распрскуе?“, прашал монотеистот.
„А млад еж ако стаиш на младеж добиваш тетоважа, ха!“, се досетил моногамниот.
„Бладаш малку, ко давеж, со ова младеживе и модрациве... А ја, пак, кај Данте сум прочитал дека ако шприцнеш млаз од свежо измолзнета крава врз младеж, губиш надеж, засекогаш...“, се зафркавал монотеистот.
„Ако млазот е млак може мрак на очи да ти падне, т.е. своевидна дамла, од која ни млада дама нема да те разбуди!“, рекол моногамниот.
„Да те прашам интимно, ако веќе треба да се прими млак млаз у уста: би мокал попрво млеко ил кафе?“, прашал монотеистот.
„Од мокање мока многу се моча, така што преферирам млеко“, прецизно одговорил моногамистот.
„Би заклучил лапидарно; добро е да се мока, т.е. цица, како момиче така, богами, и момче!“, рекол монотеистот, а моногамистот западнал во молк.
(Авторот е издавач) |
