Инвест банка со добивка од 1,1 милион евра

Инвест банка, како дел од австриската Шпаркасе, се пофали дека во 2009 година значително ја зголемила добивката во споредба со 2008 година.

Според финансиски извештаи за минатата година, ревидирани од ревизорската куќа „Грант Тортон“, „Шпаркасе Македонија“ остварила нето- профит од 73,5 милиони денари, или 1,1 милион евра, за разлика од 2008 година кога нето-профитот изнесувал 10,7 милиони денари, или 170 илјади евра. Вкупната актива на банката бележи раст од 33,4 отсто. Според вредноста на активата, банката се наоѓа на шесто место по големина во банкарскиот сектор во земјава. „Износот на вкупните кредити што банката ги пласирала лани е зголемен за 27,18 отсто во однос на 2008 година. Позитивен резултат е постигнат и во делот на депозитите што бележат раст од 27,6 отсто. Значителен показател е и зголемувањето на базата на клиентите за 24 проценти во делот на население и 30 отсто во делот на правни лица“, се вели во соопштението од Инвест банка. (Ек.Р.)