ЕУ подготвува механизам за финансиска стабилност

Министрите за финансии од земјите-членки на Европската унија вчера почнаа состанок на кој разговараат за идејата на Европската комисија за создавање механизам за стабилизација, што ќе има задача да ја зачува финансиската стабилност во Европа. Засега не се објавени детали околу предложениот механизам, но извори од ЕУ за Ројтерс наведуваат дека веќе е подготвена законска основа за примена на новиот механизам. Договорени се два механизма. Првиот е втемелен врз член 122.2 по кој Советот може да и' помогне на една држава-членка доколку се најде во сериозни проблеми. А вториот механизам ќе и' овозможи на Европската комисија да се задолжи на пазарот на пари со експлицитна гаранција од државите-членки и Европската централна банка.

Европски дипломат изјави дека ќе се создаде еден вид банка со неискористени средства од буџетот на ЕУ, што ќе служат како основен капитал за заем од 60 до 70 милијарди евра за пазарот на обврзници. Ова значи создавање европска мини-верзија на ММФ, за што се залагаше германскиот министер за финансии Волфганг Шајбле за време на преговорите за помошта од 110 милијарди евра за Грција.

Лидерите од еврозоната очекуваат поддршка и од Европската централна банка, која треба да интервенира со купување долгови на европските влади.

Инаку, уште минатиот петок лидерите од еврозоната се согласија дека е потребен механизам што би го спречил ширењето на грчката криза на земјите со висок дефицит или со низок економски раст и послаба конкурентност. Лидерите се договорија да воспостават и финансиски механизам за одбрана на еврото и за спречување на шпекулантските напади врз него. (Од агенциите)