Ифтар за тетовци на турски начин

Околу 3.000 тетовци, најголем дел муслимани, во средата вечерта дневниот пост за рамазанските денови, популарно наречен ифтар, го направија на плоштадот во Тетово. Домаќин на настанот беше градоначалникот на Тетово, Сади Беџети, и НВО „Призма“, а организатор општината Бајрам-паша од Истанбул заедно со неколку невладини организации и други асоцијации од овој турски град. За ифтарот гостите од Турција допатуваа со голем конвој под мотото ��Братството не признава граници“. Ова е специфично одбележување на ифтарот во Турција и трае цели 30 дена.

„Карванот за ифтар годинава тргна од неколку места во БиХ, а потоа преку Црна Гора и Косово пристигна во Македонија. Во наредните денови продолжува во Грција, а завршува во нивната родна земја Турција. Ова, всушност, е специфичен начин на презентирање на турската традиција и култура и има забавен карактер“, рече Седат Сулејмани, претставник на НВО „Призма“ од Тетово. (Г.Е.)