Каде ќе заврши шутот од „Космос“?

Инвеститорот е должен да исчисти, но засега му е забранет влез во објектот

Деспина Трајковска
Горан Адамовски

Купишта шут и натаму го „красат“ претсобјето на деловниот комплекс „Космос“ во скопска Гази Баба. Двата дена пауза по минирањето на објектот, за кој надлежните тврдат дека е надграден незаконски, ја легнаа прашината на земја. Што ќе биде понатаму, засега е нејасно, бидејќи од Општината цврсто уверуваат дека до крај ќе ги испочитуваат законските прописи, додека инвеститорот Фијат Цаноски е убеден дека до крајот на идната година ќе успее да го изгради станбениот комплекс. Во меѓувреме, битката ќе се пресели и во судовите.

Без оглед како ќе заврши овој случај, на кој многумина му лепат политичка етикета, градежниот шут ќе мора да се отстрани. Прописите предвидуваат дека тоа е обврска на инвеститорот.

„Но, како да исчистиме кога воопшто не ни дозволуваат да влеземе внатре“, прашува Катерина Цаневска, портпаролка на Фијат Цаноски. Од инвеститорот „Фине“ апелираа до надлежните да се повлечат за да можат нивни екипи да ја проценат штетата од уривањето, да го расчистат шутот, да го санираат тоа што може да се спаси и да продолжат со градење.

До кога ќе трае акцијата на надлежните и вчера не добивме одговор од Општина Гази Баба. Објектот и натаму се чува со полицајци и внатре не е дозволен пристап.

Од „Комунална хигиена“ и од ЈП „Дрисла“, кои се најискусни во подигањето на градежниот шут и ја поседуваат потребната опрема, потврдуваат дека досега од нив не е побарана услуга за подигање на шутот од „Космос“. Доколку одлучат да ги ангажираат, ќе треба да и' платат 480 денари за еден тон на „Комунална“, или 200 денари на „Дрисла“ за подигнат еден тон шут. Поевтина е услугата што ја нудат од „Дрисла“. Тие практично наплаќаат само за положување на непотребниот градежен материјал во специјалните локации што ги поседуваат за таа намена и кои, всушност, се единствените легални на подрачјето на Скопје.

„Кај нас истовар на еден тон шут чини 200 денари. За тие пари тој што има потреба од таква услуга, всушност, е сигурен дека нема да се соочи со никакви санкции, оти единствено истурен шут во ‘Дрисла‘ е легално истурен шут“, вели Горан Ангелов, директор на „Дрисла“.

Иако не е дозволено остатоци од урнати објекти и друг вид шут да се истовара каде било, што е законски санкционирано со големи парични казни, сепак, според Ангелов, не е голем бројот на оние што го фрлаат шутот во „Дрисла“.

„Не дека нема фирми или поединци што бараат услуга кај нас. Но, сепак, бројот е незначителен, имајќи предвид дека речиси преку целата година се гради или се урива од одредени причини“, додава Ангелов.

ОД ЈП „Комунална хигиена“ информираат дека тие нудат комплетна услуга за третман на шутот, која чини 480 денари по тон. Претпријатието не само што го истовара шутот во легалната депонија во „Дрисла“ туку врши и транспорт на непотребниот градежен материјал. Дури овозможува и најмување на наменски контејнери од 5 или 7 кубици во кои може да се положи шутот.

Не е јавна тајна дека голем број фирми и поединци го разнесуваат шутот на недозволени локации, но досега јавноста не била информирана за тоа дека се соочил со големи парични казни. Општинарите, чии комунални инспектори имаат овластување да ги санкционираат недисциплинираните, често се правдаат дека недоволниот број инспектори е причината што не можат да ги „уловат“ оние што истураат шут каде што ќе стигнат. Досега, единствено од општините Карпош и Аеродром беа успешни во справувањето со недисциплинираните. Аеродромци во два наврата регистрираа и санкционираа фирма која недозволено истураше шут на кејот. На подрачјето на Карпош, пак, лично градоначалникот Стевчо Јакимовски „улови“ несовесен жител како исфрла непотребен градежен материјал на патот кон Нерези.

До неодамна јавна тајна беше дека омилена локација за истурање шут на несовесните им беше кејот во Аеродром, но откако таму масовно почнаа да се градат игралишта и објекти, практиката стана минато.